خويه برض الشام ذابحني الحنين
خويه مشـتاگــه ازور الاربعـين
واعتـني مـشايه ** بيه شوگ اهوايه
ياخويه يحسين * ياخويه يحسين
---------------------
روحي حنت . للـزيــاره . خويه واخـتك زينب ابهمها تعاني
كلها راحت . وانه وحدي . حتـى وانه بگبري حاربني زماني
تذكر انته . من اجيتك . مــن سبيـهم لَمـن الظـالم سـباني
حالي شفته . وماعرفته . شلون لو سبيـي يرد ياخويه ثاني
خويه ماتعرفها زينب لو شفتها
خويه لـوعات الاعادي غيـرتها
همي اجيبه اويايه ** بيـه شـوگ اهوايه
ياخويه يحسين * ياخويه يحسين
---------------------
ادري واگف . تنتظرني . عالدرب وتگول راح اختي تجيني
واليجــونـك. تـنظر الهم . انـي مـو وياهم اني مـحاوطيني
مـو بـديه . ياحبــيـبي . الگوم لـَسه بالحــبال امـگيديني
والله ودي . بالــزياره . حتى يمك انه ابث شوگي وحنيني
خويه من الشام ابعث لك سلامي
خويه لجـل ازيارتك دلالي ضامي
الـكربلاء الغايه ** بيه شوگ اهوايه
ياخويه يحسين * ياخويه يحسين
---------------------
وحدي خويه . بالخرابه . والعـده يحسـين خلوني وحيده
الي ارسل . ابو الغيره . ايردني خـويه الكربله انه اريده
خل يجيبه . محمل اخته . وعلى الناگه هو اليركبني بيده
وبكفيلي . والله ادري . راعي نخوه نخـوتك اعرفها عيده
خويه خل ايخلص اخته امن العذاب
خويه بَلغـه زيـنب ابـهـم ومصـاب
ولو يجيب الرايه ** بيه شوگ اهوايه
ياخويه يحسين * ياخويه يحسين
---------------------
ابهمي وحدي . وطفله عندي . خويه برض الشام بس انه ورقيه
اتگــلي عمه . ادياري ظـلمه . خلـي نرحل عمه لرض الغاظريه
واني انحب . واخفي صوتي . حتـى بنتـك خـويه لاتبچـي عليه
عدها مدمع . من يسكنـه . والله ميســكن دمعـها الــه المنيه
خويه اواسيها ومنو الزينب يواسي
خوي ماظـلت الـي بـس المأسـي
اوياي مو وفايه ** بيه شوگ اهوايه
ياخويه يحسين * ياخويه يحسين
---------------------
تذكر انته . من سبوني . چان راسك باليسر ياخويه حاظر
من احن لك . والله انظره . هسـه المن يالأخو بالله اناظر
حتى گبري . ليـه يـسأل . يمـته يازينب لبو اليمه نسافر
ولو تسمعه . صوته گلبي . لشوكت ابقه يگلي انـه صابر
خويه يمته انوار صحنك ليها اشوف
خويه مشتاگه ابحظـرتك انه اطوف
عگلي رايح رايه ** بيه شوگ اهوايه
ياخويه يحسين * ياخويه يحسين
---------------------
على دربك . انه اوگف . انه وَيه الريح ابث شوگي وهيامي
ايمر عليه . بلكي زاير . حتى بيده ارسل يـبو اليمه سلامي
تدري زينب . ماتعوفك . حتى لوزادت عـلى گبري المرامي
ابقه اللهج . خويه خويه . ويـبقه لزيارتك گلبي والله ظامي
خويه دلالي يحن ليل ونهاري
خويه تعبني يـخويه انتظاري
الك اروي اروايه ** بيه شوگ اهوايه
ياخويه يحسين * ياخويه يحسين
