{ ديب العمر }
خاطرة مكتوبة بالشعر المحكي
~~~~~~~~~~~~~~~~~~
يا سنين الطفولي
شو بكي
عـ بتندهي عليّي
كل يوم ليليي
بتركضي وبتِّغللي فيِّي
خايفي من ديب العمر
يجي .... مخبى بـ ظلال القمر
من تلجات أذار البرداني
جاي من خلف سندياني
بعد ما غفيت الغابي
يشمشم تيابي
يعوي ويكشِّر نيابو على عتابي
... لاتخافي هيدا الهوا
كل يوم بيجي
وبتدقدق نهداتو على بوابي
بـ تفيّق خمرة العشاق
من الخابي
وبتركض الكاسات
متل غيمات الشتي
متل الدمعات
الهرباني من نهر البكي
تـ نسكر سوا
... لا تخافي
يا سنين الولدني
هيك الدني
رح نبقى فيها سوا
ما نحنى عشنا سوا
ربينا سوا
وكتبنا حروفنا عـ حبال الهوا
وغنينا للسما تواشيح
بعرس الريح
ورسمنا ضحكاتنا
عـ وجه القمر موال
ورسمنا من أحلامنا
ألف شلال
ونطرنا سوا شمس بكرا
... لا تروح
خليك بـ بحر صدري
سفينة نوح
وقصة عمر للذكرى
وحروف
غفيت بعد سكرة
متل عناقيد الخمر
لـ غافي بخابي
داخل كتابي
علاء الغريب / كاتب صحفي
