بقلم - محمد حمدى
الجمهور : بوحة،يا بوحة،يا بوحة !
بوحة : مين بينادى ؟!
الجمهور : احنا عيال خالتك،يا بوحة !
بوحة : يا راجل ؟!
الجمهور : هبطونا درجة رابعة،يا بوحة !
بوحة : هم مين دول،ياد ؟!
الجمهور : ولاد أبو اسماعيل،يا بوحة !
بوحة : يا راجل ؟!
الجمهور : خربوا النادى،يا بوحة،وخلوا سمعته زى الزفت،وهبطوا الفريق !
بوحة : ومواليد 2001،و 2002،بتوع النادى فين ياد ؟!
الجمهور : سرحوا الفرقتَين،يا بوحة !
بوحة : ياراجل ؟! دا على كده ولاد أبواسماعيل معاهم فُرش شعر،وإمشاط كتير !
الجمهور : دا حتى فريق مواليد 2006م اللى كان فيه لاعيبة شايلة الفرقة فى الدور الأول زى محمد عثمان،ومحمد على مبارك-لانشون- ، ويوسف أبوسعد- أوباما-....ركنوهم فى الدور التانى !
بوحة : طب فين اللاعيبة الكبيرة بتاعت البلد زى : سامى أشرف الحوشى،ومحمد شوقى،وأحمد الدهشورى،ورضا القصاص،و حسام نزيه بدير،ورمضان أبوليلة........
الجمهور : كنا خلاص إتفقنا مع خمسة مِنهم فى يناير لكن ولاد أبواسماعيل قالوا لينا : "معلش السيستم قفل يا رجالة "
بوحة : ولاد أبو اسماعيل قالوا : "معلش السيستم قفل يارجالة " ؟!
الجمهور : دا حتى مُحسن إبراهيم هنداوى ، اللى كان بيقول : "هألعب معاكم مِن غير فلوس خالص "،بعد إما خلصنا معاه خالص قال : "أنا مُش هأقدر ألعب ؛علشان أنا مصاب؛حتى شوفوا الأشعة،يا رجالة " !
بوحة : وسع،ياد،بوحة هو اللى هيلعب لواحده فى الملعب،وهيصعد بيكم قسم تانى .
الجمهور : إزاى،يا بوحة ؟!
بوحة : مفيش ظُلم خلاص لولاد البلد،وغير ولاد البلد،وهأكنس ولاد أبواسماعيل مِن النادى .
الجمهور : إحنا معاك،يا بوحة .
بوحة : دا مركز دسوق لواحده فيه لاعيبة تصعدنا قسم تانى،ومُش هيكلفونا حاجة .
الجمهور : دا غير لاعيبة المراكز المجاورة،زى الرحمانية،وفوة،وسيدى سالم،وقلين،يا بوحة .
بوحة : مِن النهاردة مفيش ولاد أبواسماعيل،مِن النهاردة فيه الجمهور المُخلص،وبوحة الصباح،وصبح صبح،يا عم الحاج .
( ملحوظة : تاريخ كتابة تلك القصة،ونشرها على الإنترنت،يوم الأحد الموافق 5 مايو 2024م )
