رياض المنفلوطى : هو النادى عمل إيه ، يا أدهم ؟!
أدهم : ما عملشى حاجة ، يا فندم !
رياض المنفلوطى : ما عملشى حاجة إزاى ؟! هو مُش كان بيلاعب النهاردة المنشأة الكبرى ؟!
أدهم : المنشأة الكبرى ، فازت علينا بهدف نضيف !
رياض المنفلوطى : يا نهار أزرق ! يا نهار أزرق !
أدهم : أسود ، يا فندم !
رياض المنفلوطى : دا إحنا لسه الأسبوع اللى فات مهزومين مِن مركز تنمية شباب دسوق ، بهدف نضيف ! هو إيه حكاية الأهداف النضيفة اللى بتيجى فينا دى ، يا أدهم ؟!
أدهم : إن شاء الله هنفوز على قبريط الأسبوع اللى جى ، سعادتك !
رياض المنفلوطى : دا فى العنب ، يا أدهم !
أدهم : هندعم نفسنا فى يناير !
رياض المنفلوطى : هو نادى دسوق هيبلط فى الرابعة ، ولا إيه يا أدهم ؟ !
أدهم : قبريط الأول بفارق 3 نقاط بس ، قبريط معاها 9 نقط ، وإحنا 6 نقاط ، وبإذن الله هنفوز عليهم ، دا الماتش هيبقى على أرضنا ، سعادتك !
رياض المنفلوطى : يا نهار أسمر ، يا نهار أسمر ،دا مُش فاضل إلا أننا نخش الدورة الرمضانية اللى بتتعمل تحت الكبرى ، ونخسرها !
أدهم : نهار أسود ! شفتك رفعت خالص ، يا فندم !
رياض المنفلوطى : شفتى بترفع مِن التوتر اللى أنا فيه ؛ دا أنا مِن الموسم اللى فات مُش عارف أبوس مِن ديك أم شفتى اللى بترفع وتسد مناخيرى ، وبتخلينى مُش عارف أشخر كمان !
أدهم : بإذن الله هنصعد !
رياض المنفلوطى : بأمارة إيه يا أدهم ؟! دا إحنا لعبنا 4 ماتشات فى الدرجة الرابعة ،ومخدناش مِنهم غير 6 نقط بس ، دا درجة رابعة ، يا أدهم !!!
أدهم : عارف قصدك سعادتك ؛ دا إحنا كنا زمنا فى دورى المحترفين ، أو القسم التانى على الأقل !
رياض المنفلوطى : إمنع جميع الأجازات لحد ماتش قبريط ما يعدى على خير ؛ لازم نجيب قبريط بهدفَين نضاف ؛ علشان نستعيد هيبتنا !
أدهم : حاضر ، يا فندم !
( تاريخ كتابة تلك القصة ، ونشرها على الإنترنت ، يوم الجمعة الموافق 29 نوفمبر مِن عام 2024م )
