ك فارس : إن شاء الله يا حاج متولى، لما أقبض المُرتب ؛هأدى كل واحد مِنكم الفلوس اللى سالفها مِنه !
فتحى : موت يا حمار!
متولى : إحنا بقالنا سنة بنسمع مِنك الكلام ده !
صلاح : أنا عارف كُل أخبار النادى بتاعك يا ك فارس .
ك فارس : عارف إيه يا صلاح ؟!
صلاح : أخر الأخبار اللى عندى أن المُدرب الجديد قدم إستقالته ؛ علشان مُماطلة مجلس الإدارة معاه ، ومعاكم !
متولى : الخبر ده قديم يا صلاح !
صلاح : لأ ! ما هو فيه مُدرب جديد كمان مسك مِن أسبوع .
فتحى : مِن أسبوع؟!
صلاح : أه ، وقدم إستقالته ؛علشان النادى مدفعشى المقدم بتاعه !
فتحى : شوفلك شغلانة تانية يا ك فارس ، غير كُرة القدم !
ك فارس : أنا كرة القدم أكل عيشى ياخونا !
فتحى : وهتقضى حياتك سلف فى سلف كدا يا كابتن ؛ دا إنت بقى عندك 29سنة ؟!
ك فارس : أنا هأتمرن كويس ؛علشان أخش التشكيل ،وأنزل الملعب جامد ؛ السماسرة يشوفونى ،وأروح لنادى تانى فيه فلوس ياعم فتحى .
متولى : ربنا يكرمك ، يا ك فارس !
ك فارس : يا رب ، يا عم متولى !
فتحى : عندك أخبار إيه تانى، يا صلاح ؟
صلاح : مُدرب الحُراس غايب، والحارس التانى غايب ،وكُل اللاعيبه بتغلى مِن جواها ؛ علشان المُرتبات المتأخرة ، دا حتى الصفقات الجديدة نفسها إتسدت !
فتحى : نادى طويل عريض ،ومفهوش فلوس للمُرتبات ؟!
صلاح : فيه ناس فى المجلس هناك بتقول : "إن جميع اللعبات بتصرف على نفسها إلا كُرة القدم" مع أن كُرة القدم لو شغلوها صح ، وبقى عندهم قطاع ناشئيين ،كُرة القدم هتبقى أكبر مصدر دخل لنادى !
ك فارس : دا بيبيعوا كُل موسم لعيبة بأكتر مِن 100ألف !
صلاح : بس لو فيه إهتمام ،ونظام هناك ،الرقم ده هيوصل لمليون، وأكتر ، دا غير توفير الفلوس اللى بتتصرف على الصفقات الجديدة ،والبلد مليانة مواهب أهلهم فاقدين الثقة فى النادى بتاعك ؛بسبب شغل السيكة، والتلت ورقات بتاع ناس فى المجلس !
متولى : يا جماعة، صلوا على النبى أومال ،ومتسدوش نفس الراجل خلى الراجل يلعب بحماس ؛علشان يروح مكان يتقدر فيه بدل المكان ده !
( تاريخ كتابة تلك القصة القصيرة ، ونشرها على الإنترنت ليلة السبت الموافق 19أكتوبرمِن عام2019م )
