(انا نازل ونزولى عشانك) للشاعر سمير احمد القط

انا نازل ونزولى عشانك
ورجوعى بيكى مرهون
لو مت يشهدلى حنانك
لكرامتك الكل يهون
ماانا غيرى ماتوا فى احضانك
ولا خافوا ..ماالخوف ملعون
انا نازل ونزولى عشانك
ورجوعى بيكى مرهون
انا نازل ونزولى عشانك
والمر بحلقى ومستكفى
يشهدلى زمانى وزمانك
سلخونى ..واللحم مشفى
قتلونى ونَكَروا فى القاتل
والجانى جوه اوراقهم
والظلم شربتوا فى جرادل
بالكذب ..رَبِك يحرقهم
انا نازل ونزولى عشانك
ورجوعى بيكى مرهون
ولاوعد ولاعهد اتحقق
ولادم اخذوا بقصاصُه
والارض الخضراء بتشقق
بالخزى ..فضحونا وداسوا
انا نازل ونزولى عشانك
ورجوعى بيكى مرهون
ولاميه ولاضوء متوفر
ولاراتب يكفينا اللقمة
والغُلب والهم مضفر
لو جعونا الفقر يسوقنا
انا نازل ونزولى عشانك
ورجوعى بيكى مرهون
لامدارس بتعلم جيل
ولاصحة لمريض غلبان
ولاجامعة تحصد قناديل
فى الهم كلنا تعبان
انا نازل ونزولى عشانك
ورجوعى بيكى مرهون
ولافكر ولاخطة تنور
ولا منهج يجي بمشاريع
وغريبنا .ينكش يِدور
ببضايعه ولغيرنا يبيع
انا نازل ونزولى عشانك
ورجوعى بيكى مرهون
ماخسرنا مكانتنا الكبرى
والهيبة ضاعت للسيد
مدينا آيادينا ياصابرة
نتسول والبعض مأييد
انا نازل ونزولى عشانك
ورجوعى بيكى مرهون
مافضلشى غير الانفاس
من بعد كرامتنا الغايبة
وضربنا  اخماس اسداس
  فى ايدنا الدنيا بقت سايبة
انا نازل ونزولى عشانك
ورجوعى بيكى مرهون