ياأبن بلدى ...للشاعر سمير احمد القط
قوم يامصرى عَلّي صوتك ...وامسح الدمع الحزين
ده النهار رافض سكوتك ...شد عزمك قول آمين
ارفض العهد اللى ولى ..وامحى ظلمك م الكتاب
دى الحرية علينا طله ...والرسالة عايزة جـواب
حط ايدك ع الطريق ...ياابن بلدى بلاش عتاب
واجعل الشمس رفيق.. فارده ايدها مش سراب
وارمى همك او عذابك ...يلا عدى بدون رجوع
ده الشهيد عمره ماسابك..ومات فى حضنك بالدموع
والدماء سالت فى ارضى ...بالزهور كانت فـروع
هتفت باسمى وعرضى ...شاريه فينا بدون خضوع
قوم يامصرى افرد دراعك ..خد بايدها وامشى بيها
هى حضنك وكل باعك .. ..لو باعوها اشــتريها
مين باقيلك بعد ناسك ...مين فى صدره حاضن ولادك
مين بيبكى لجل زادك ...مين يحــــبك غير بلادك
أنت باقى وهى باقية ...والكتاب يكتب سطور
أنت ربان وساقية ...والنـهار.... عايز عبور
حط ايدك فى ايد اخوك ..وابنى تانى فى حته نور
ده العزيمة عاوزة صكوك ..وأنت ماضي لو صبور
قوم يامصرى عَلى صوتك ...وامسح الدمع الحزين
ده النهار رافض سكوتك ... شد عزمك قول آمــين
الحقوق محفوظة للمؤلف
ساحة النقاش