يا مصر يا ام الوطن تايه مابين الخوفْ
يترجَّى ضى القمر .. بس القمر مكسوفْ
ينده حكاوى الأمل تعطَّر ليالى الشُّوفْ
يامصر يا حلم فقير عاش الحياه مكتوفْ
الحلم فين ياوطن .. رُدْ على الملهوفْ
تلاتين سنه أنا العاشق فيك وأنا المجروحْ
أنا العرق . والعلم . والضمير . أنا الروحْ
ماتقوللى ليه ياوطن كل ما فيك بينوحْ
اترجَّى فيك عدل وأمل ألقى الأمل مدبوحْ
أستنى فيك نور القمر ألقى القمر بِيروْحْ
تلاتين سنه وانا التايه فى بحر الخوفْ
لاعارف فين أنا شطِّى ولا شايف سفينة نوحْ
تلاتين سنه ياوطن وفيك أنا المجروحْ
ف قطر الصعيد تِلقانى ودمى أنا المسفوحْ
ف توهة سكك عنونى لوجع العِلل موصوفْ
ف كل ندهة ألم أنا الوتر معزوفْ
ماتقوللى ليه ياوطن دمعى عليك بيهونْ
وأنا اللى باحضن دمعتك ولايوم عليَّ تهونْ
ماتقوللى ليه أناعايش فيك الحياه مغبونْ
ماتقوللى ليه ياوطن كل ما فيك مجنونْ
وانا اللى عاشق ضحكتَك وعشقى ليك مكنونْ
.......................................................................

إليكَ يا وطنى كلماتى برغم عشقى وودادى .