بمناسبة عيد الأضحى المبارك قصيدة جديدة جدا :
ما لهاش مكان
اللى عايشة ف كان وكان
وتحيض كراهة وعنجهية
ويتولد
ألف تعلب خلف بابنا
مش بيكسب غير ما يشرب
ألف كاس من دمانا
ويرتوى بقتل الأدان
ما لهاش مكان
بنت الديابة والضلام
والرمش الأعمش لما يرمش
بالحرام
ساعة موجة من غباوة
جوا إعصار مش بدمر
بل بيمحى الإنسجام
إوعى تشرى أو تصدق
إن توب الغدر باقى
مهما يظهر الاحتشام
ابن آوى ريحته إيه
هل يخيلك إنه مسك
تبقى غاوى تكون لخيبتك
إمعة
أو تعيش فى جيتو غيك
مش بزيك أو بنفسك
بل مغرب زى واحد
مات له عقله
وامحى ف وسط الزحام
إيه جوابك لما تسأل
عن ولادك والوطن
لما بعته بكرسى داير
لما رحت ف كف عيرة
وكف قاتلة
لعبة شينة محركة
فيك العفن
إنت مين لما تبنى ألف سد
ف وش أمك
مين يهمك إلا نفسك والمحن
كان زمان كنا فيه
نحسن الظن بساعدتك
قمنا مدحنا ف سيرتك
بان نيابك وسط لحمى
وانطحنت ف لون حقارتك
كل ما تخبى بيظهر
ضبع منك ..شوق مماتى
تبنى قومتك من جديد
فوق رفاتى
إنت كنت زى دودة
ف وسط مشتل جوا طينه
جذره تاكل
عمره تاكل
مشتهينه
لما جالك طير مهاجر
راح مصادر زيف وجودك
واستقام من بعد غيبتك
عود حياتنا
روح ما يوعى يعود الينا
ساعة منك
إنسى ظنك إن شعب
لما يصحى يخاف لجنك
هو لما الشمس تطلع
راح تغمض عين حياتنا
فوق لأنك كنت ناسى
إن فاسى ف أرضى تزرع
مش تدمر
والفكاكة اللى انت فيها
ضاع حروفها
قوم وشوفها مصر جاية
بصبح بكرة
مصر زاحت كوم ليالى
فوق صدورها
مصر غنت .. مصر زنت
والمدى من نور بهاها
راح يطاطى
والخيول اللى ف جموحها
ليها طبعا مين يرود
كالساعاتى
لسه فيها طعم طه
والفراعنة والمسيح
لسه فيها الديك بصيح
والحانوتى
للى يسرق نور عنيها
ويشتكيها
هو فيه ف الدنيا حد
بيشتكى وقت الرضاعة
صدر أمه للضباعة
سلح الأطفال بفهمك
واشعل النيران عليهم
كلب قلبك عض وردة
فتحت وقت الغروب
لما تحرن ..سعرة منك
محتاجين لألف حقنة
ينطفى بيها اللهيب
يا الله توب
وانده الشطآن فى موجك
يمكن الشطآن تجيك
سيب شوية باب موارب
يمكن النسمة تعدى
وتستجيب
الجروح لو يوم تنام
النجوم راح تشتكيك
مهما تنبح ضوءها لينا
والسفينة خلاص أوانها
ف القلوع
لو نجوع ساعة عبورنا
مش ها نرجع مهما بحتم
بالخريف وقت الربيع
الشاعر وحيد راغب
