وثيقة ثورة
أكتب وقول يا خال
أكتب وقول موال
عن شعب فاق وثار
صبر على الظلم ليالى طوال
لكنه فاق من غفوته
فاق من سكرته
وشد للثورة رحال
شعب وشه نور
بعد الظلام ما طول
خرج من دروبه ونوى
حطم قيود الهوى
خرج من كل حارة وشارع
أزهر وكنيسة وجامع
ولثورته فتل مقالع
خرج زاحف للميدان
تحدى رصاص ونار
وعلا كلمة الثوار
خلى الثورة عنوان
عنوان غضب
عنوان امل
عنوان فرحة بتتولد
رسم حلمه بعلمه
حطم كل محال
فرق مجامع .كسر صوامع
خلع حاكم جبار
خلاه فى سريره
عليل منهار
وصدر عليه بالسجن احكام
خلاه ذليل وعلى الباب سجان
.....................................................
اكتب وقول يا خال
اكتب وقول كلمة
فى ثانية تفرقت اللمة
وتشتت العزم والهمة
والكلمة صبحت الف كلمة وكلمة
أخوات وشقايق
كانوا على الحلم مجتمعين
وعلى الوعد متقاسمين
يزرعو الفل والياسمين
وجناين خضرة للحاملين
فرق بينهم القارب
وصبحوا فرجة للخلايق
يا خلق بالراحة
الحق محتاج لصراحة
ورؤية ساطعة ووضاحة
....................................
أكتب وقول يا خال
أكتب وقول غنوة
فى لحظة تسرقت الثورة
شعب حلمه خاب
سرقته حفنة مليانة احقاد
احقاد قديمة والجديد
غطى عليها وزاد
سرقوا فرحة بتتولد
كتموا الضحكة فى حلق الولد
قالوا نهضة هتتولد
وختير كتير هيعم
وبلاد من كبوة هتتنجد
كبوة طالت
ومعالمها بانت
صابت البنت ويا الولد
وأسكت هس
بس انتخب
لا تشرق ولا تغرب
ولا تبحر ولا تقبل
ولغيرنا ما تلتفت
دا احنا الحق
وعبيد الرب
والعلم لينا توهب
وصدق الشعب
ووقع فى المطب
طلعت النهضة خدعة
وكدبة كبيرة وبدعة
والثورة راحت
واحلامنا ضاعت
والشيطان شاطر
مابين الهزل والهرتلة
وصبحت مصر
عتمة فى عتمة
صهد وصهيد ونار قايدة
وسلطة للشعب قاسمة
وسنة عدت سنة فاتت
فيها الشعب انقسم
واحد مسلم والتانى كافر
وشمعة انطفت
وثورة ماتت
ورئيس عاجز
اهبل ومش فاهم
لا صنع نهضة
ولا كفى مظالم
والثورة راحت
وأحلامنا ضاعت
,,,,,,,,,,,,,,,,,,,,,,,,,,,,,,,,,,,,,,
أكتب وقول يا خال
أكتب و أحلف مية يمين
من بين الالم والانين
خرج شباب
من وسط الارض والطين
وخلى العرس
يوم تلاتين
وكان الفرح لامم
خلق كتير
بيه و أفندى
وناس لابسة عمايم
الصغير فيه ويا الكبير
المدير جمب الغفير
يارب هاتها جمايل
خرج الشعب
رافع كروته الحمرا
حالف يرجع مبادئ الثورة
ويعزل رئيس رجعنا
لزمن الترك والمقاولة
وصبح الصباح
يا عليم يا فتاح
والديك يدن
والعصفور زقزق
مع صوت خير الملاح
صوت شاب شهم وزين
والاسم عبد الفتاح
وصوت المساجد أذن
والكل وراه حمد وكبر
بسم الله
صرخ السيسى
ولدعوة شعبه لبى
ورفع الراية
راية وئام ومحبة
وجيشنا من وراه
لينا حيط صادة
فى وش كل خاين
عميل ونفسه فاسدة
السيسى قال كلمته
كلمة هزت كل الميادين
كلمة من كلمات صلاح الدين
فكرنا بعرابى
فى ميدان عابدين
وصرخة ناصر
اللى صحت ملاين
كلمة فرحوا بيها الغلابة
وزعلوا منها الضالين
قال مصر
ام الدنيا وهتبقى اد الدنيا
مصرة حرة
ومنارة للعالمين
شعبها مش عبيد لفرقة
او جماعة
برئ من فعايلها الدين
صرخ الشعب واحد اتنين
أنت جيت
أحنا مستنينك من سنين
من ايام النار اللى فى حطين
وصرخة تأميم القناة
وبنى السد العظيم
عزمنا بك شد
وفرحتنا بيك كملت
هنشيلك فوق كتافنا
هنحميك جوة ضى العين
بينا وبيك هنعبر خوفنا
ونداوى جروحنا
ونحقق حلم السنين
هنخطى الامنا
وندوس على اللى ظلمنا
ونزرع جنانين ورد وياسمين
...........................................
بس وحياة ربك العالى
ما تظلم شعبك من تانى
شعبك اتظلم
ومن حلمه تحرم
ايام وسنين
خد بيده قوى عزمه
عيشه عيشة البنى أدمين
دا شعبك طيب وراضى
قليله كتيره بيه راضى
شعب كيس لين
مش عاصى
كافى خيره شره
ولا عمره غيره بيعادى
سارى فيه
ندى الارض والطين
بس المهم عنده كرامته
تحفظ مقامه وتعلى قيمته
دول لو جار عليهم حد
أو أيد تانى عليهم تتمد
هتلاقى الطيب
بقى قاسى
على العزيز يدوس
ولا يواسى
وفى لحظة يكون فيها
جد الجد
ولا يهمه بيه ولا رئيس
ولا حيطان عليه تتهد
