كل يوم الجرح يكبر والطبيب لسه تايه ف الحكاوى

والبُنيه جراحها تنزف والسما غايمه الأمانى

كل يوم والبسمه رافضه تترسم فوق الغناوى

والطيور عاشقه الرحيل ولسه تايهه ف البراري

كل يوم هم البُنيّه حمل فوق كتف الأمل

كل يوم باكيه البُنيّه تنام على كفوف الألم

كل يوم والطبيب لسه تايه ف العللْ

لسه بيفك الطلاسم لسه بيقول المِللْ

لسه بينادى اللى نايم لسه بيناجى الطللْ

امسحوا دمع البُنيّه اعشقوا النيل والهرمْ

امسحوا دمع البُنيّه واغزلوا م الفجر توب

ارسموا م الشمس بسمه وعطروا بيها القلوب

رجَّعوا صوت البلابل فوق غصون الورد شوق

خلّوا ضي الفجر يطلع واعملوا م الحُب طُوق

دا البُنيّه لسه راجعه تترسم فوق الخدود

دا الُبنيه عودها أخضر نيلها يجري بالخلود

امسحوا دمع البنيه وازرعوا ليها الورود