<!--

<!--<!--<!--

ولأني أم

..........

( 1 )

ولأني أم ...

كل المشاكل فوق دماغي

مكركبه

إبني اللي خايفه عليه عشان

ما يجرهوش إبن الجيران

ويروح لسكّه مرعبه

بنتي اللي رافضه كل شئ

ما قالتش كلمه تبل ريق

وف قلبي قايدالي حريق

حتى ف راحتها مُتعبه

ولأني أم ....

مكتوب أدوق الهم

 حتى ف العسل

مهما حصل

ما اقدرش أدعي ع الضنا

وتمللي جوايا أنا

ب اشعر بإني مذنبه

دا لأني أم ...

 ( 2 )

ولأني أم ..

بفرد صوابعي تسبيحات

وافرش كفوفي بسمله

وافتح لهم ف الحضن حضن

والضحكه سجادة صلا

واربط على البطن الحزام

م الجوع عشان يتقوّتوا

وادعي ياجوز لحظة غضب

وان حد أمّن ع الدعاء

بسناني أكله واموّته

وبرغم عوزتي لحضنهم

سايبنلي قلبي ف وحدته!

لكني بدعي ربنا

يحمي ضنايا ف سكّته

دا لأني أم

( 3 )

ولإني أم ..

ولأن عيد الأم واقف ع الببان

مدّيت إيديّا بالحنان

مالقيتش غير

كل العقوق هو الهديه من الولد

جوايا شئ بيموت كمد

وما زلت بدعي بالهدى

يا ضنايا عندي المبتدى

ف ازاي يكون جواك جبان

دالبر سكة أنبيا

ليه ترتجل سكة شيطان؟

ولأني أم ...

هفضل برغم عذابي بيك

حضن الأمان