>>>>>>>>>>>>>>>
علمونا فى المدارس
ان البطوله دى كات زمان
علمونا ازاى نخاف
نمشى بضمير جوه الحيطان
ونبص من خرم البيبان
على قهر سارح ف الوطن زى الطاعون
مسكين انا
يللى ابتديتها بالدموع
انا كل واحد كان هنا
ووعدها مفيناش من رجوع
نزل الميدان...
حبيت على اديها وبكيت
كان الشتا بيحنى كفى بالمرار
وصوت سكوت
بسمع صداه زى الغنى
موال ف عتمة ليل طويل
وسط الحصار
كانت قصيدة عشق مكتوبه بخيال
عنوانها كان المستحيل
ومدادها من نهر المحال
وقنابل الغاز اللى بتعطر ورقنا ع الرصيف
ووشوش ازاز
متنكره ف وشوش خشب
الاصل من جواه ضعيف
والصوره مسجونه ف عطب
مارد خرج عن صمته يصدح بالغضب
كان محبسه بين الضلوع
مفيناش رجوع !!
جه يوم ولازم تسمعينى
بكفايه جرح.... !!
عايزانى ليه اعبد سراب ؟؟!!
واستنه يمكن.. ييجى فرح
ولا عمره جاى ..
الا بغضب ..!!
الا بشهيد
ووراه شهيد
ووراه شهيد
هى الشهاده بتنكتب عند الوطن
غير بالهمم
غير بالبكا ع الدم
وسط الهم
بين( لا ) بريئه
وسط مليون صوت بيهتف بالرضا
مليون نعم !!!
تبقى الاسود
محبوسه والحريه من حظ الغنم
من حظ بياعى الذمم
من حظ عرض رخيص فى سوق الذل بايدين الرمم
تفتى العمم
دول خونه وشوية رعاع
انطق بقى ...
مين فينا باع ؟؟!!
الثوره دى مكنتش ثوره للجياع
مكنتش مرهونه بمناصب او شخوص
الثوره كانت للكرامه ..
مش صراع
الثوره كانت للعداله
الثوره حريه لعقول
بتبان شموع
والوعد مفيناش من رجوع
#الاثر_المفقود
