‏‎‎‏

ايه النظام يا سيدي ؟
ايه النظام يا عم ؟
هتفرحني ف عيدي
ولا نقضيها دم ؟
افتح انت بطاقتي
وشوف مكتوب فيها ايه
مكتوب اني مواطن
عادي يعني مش بيه
مواطن نفسه يعيش
ان شالله ع التناتيش
مواطن مش ف باله
شعب وشرطه او جيش
ملوش ف المصطلحات
وجعلصه الكتابات
شبع من كتر ما سمع
حواديت وكتير حكايات
عن معني الكيف والكم !!!!!
ايه النظام يا سيدي ؟
ايه النظام يا عم ؟

يعني ومفيهاش احراج
وسؤالي دايما علي بالي
حاسين انتوا بمحتاج ؟
شايفني انا وعيالي ؟
انا مالي بقال وقيل
وكلام مخابيل مهاطيل
من كتر ما قولتو وعيدتو
رجعنا قابيل وهابيل
والدمعه اللي كات محبوسه
خرجت وكمان افراج

مش عايز ابقي رئيس
ولا حتي نفسي منصب
انا عايز الاتوبيس
يقفلي قبل انا ما اركب
خلوني بس اعيش
ربنا يخليلكوا الموكب
كفايه عكعكه وهجايص
وكفايه عليكم كدب
امضاء
مواطن دايما لايص

سيد صادق