اذكر من چنه ازغار ؟!!
من يجي الشته نتجمع حول صوبة علاء الدين وفوگهه قوري الچاي ويمهه شيشة دبس الدمعه وراشي الموصل ونخبط وناكل . . .
من تطفى الكهرباء نشغل لالة لو فانوس ونسمع قصص من اهلنه عن شبابهم لو عن الحروب. ومرات نطلع بالشارع نلعب ختيلان . . .
واذا اجت الكهرباء الكل يصلي عالنبي واله لا اراديا وننفخ اللالات ونروح عالتلفزيون لو نحل الواجب مال باچر والاكثر والدي والدتي همه يدرسونه . . .
الصبح نروح للمدرسة واللفة بالجنطة (اذا الامور زينة) ومرات بس خيارة لو اي شيء. ونقرا النشيد الوطني ومن نرجع للبيت فرحانين 
الخطار چان من يجي الكل يستقبلة بحرارة بدون ماينطي موعد وهسة اذا اجة الخطار الكل يگلب وجهه . . .
چان التلفزيون بي 3 محطات وكلشي بتوقيتة الاخبار والكارتون والافلام والرياضة. وما كان اكو نت ولا ستلايت . . .
چان خبز الوالدة وكليجة العيد ميعوضهن صمون الفرن لان بي حنية تحس . . .
چانت العابنه دعبل و7سيفونات وركيضان يعني اللعب جماعي وعايشين طفولتنا. هسة الطفل بوحده يلعب بالايباد والبلي وغيرها 
يعني چانت حياتنه بسيطة بس كلشي اله نكهة خاصة وطعم حلو. برغم الفقر والوضع المادي المتأزم