إدونى نجمه ف كراسى 
إدونى علامة صح 
أنا زى ما شافت راسى 
وعرفت الكخ والدح 
زى متعلمت كتبت 
زى مسمعت اتكلمت 
زى ما شتمتوا شتمت 
زى ما سرقتوا سرقت 
أنا شاطر واتعلمت 
إوعوا تقولوا مش إنسان 
إوعوا تقولوا عنى لص 
أنا لو شايفينى جبان 
أنا كنت عليكوا ببص 
أنا انتاجكم أنا خلفتكم 
أنا مستوعب للدرس 
إوعوا تقولوا إنى خاين 
وللا تقولوا معنديش أصل 
انا كنت بشوف وبعاين 
أنا صوره طبق الأصل 
إوعوا تقولوا سفاح 
وللا أخلاقه زفت 
إزاى راح تجنوا تفاح 
وانتوا زرعتونى لفت 
إدونى نجمه ف كراسى 
إدونى علامة صح