يلا ياعم الخريف
علمنى ازاى التخريف 
علمنى ازاى النسيان
ألحزن والفرح سيان 
خلى ألوانهم واحد 
أنالسا بميز فى الألوان 
إمسح من زاكرتى الماضى
خلينى أنسى اللى فات 
من أول مين هما اجدادى 
حتى الأحزان والآهات
خلينى صفحه بيضا
وسطور مفيهاشى كلمات
مش عاوز أعرف أنا مين
ولا سكتى رايحه على فين
يلا خلينى أوصل 
من غير معرف إيه بيحصل 
مش عاوز أعرف إيه فات 
مين باقى ومين اللى مات 
خلينى بس آكل واشرب 
ودماغى م العالم تهرب 
لو فيه حاجه تعلمهالى 
علمنى ازاى السكات