تاهت كلمه و مش لاقينها 
نص بلدنا بقوا ناسينها 
والنص التاني مهما يعاني 
مش عارفينها 
اسمها عدل و لو لقيتوها 
أو شوفتوها 
روحوا قولولها أن ابوها
عم ( الحق ) هيطلع عينها 
غايبه بقالها سنين و سنين 
راحت فين؟ ماحنش عارفين 
و اهو بسببها اتنين ف اتنين 
مش زي ما احنا دارسينها 
خلوها خمسه و ساعات تسعه 
و خلوا طوافنا قبل ما نسعى 
كرهنا الدنيا أو كرهتنا 
و بقى تار بايت بينا و بينها 
كلمة عدل ولو يوم رجعت .. 
وسمعت بس أنين الناس .. 
و أن عشانها بيموت خلق .. 
و ان ابوها ياما انداس 
و ان الدنيا ماهياش دنيا 
و دايما ماشيه عكس عكاس 
و ان الصبر معدش مكفي 
واليأس جوه الأنفاس 
كلمه عدل ماتت حسره 
لما شربنا المر ف كاس