فهمونى واشرحولى
فى رساله وابعتولى 
هوا دا الوضع الطبيعى 
ليه لازم أنا اللى اتغير 
ليه أعيش تايه متحير 
هوا انا اللى اخترت نوعى 
ليه تجيبوا الوم عليه 
ليه تورونى الأسيه
دا العذاب كسر ضلوعى
ليه أوافق من سكات 
ليه أعيش زى اللى مات
ليه تسيل منى دموعى
إمته أخلص من همومى 
ليه ملقاش فى كل يومى
ساعه حلوه تسد جوعى
مين بيلعب فى الأصول 
مين بيبدل الفصول
ليه خريفى يسبق ربيعى
مين بيقول للدنيا تعاكسنى
مين بيخلى الحظ ناحسنى
فين اليومين الحلوين بتوعى
مين اللى سهانى وسرقهم 
واللى فى لحظه أخدهم
واللى قال للدنيا بيعى
نفسى أعرف حاجه واحده 
وبلاش مناكفه بقى ومعانده 
هوا دا الوضع الطبيعى ؟