ساعات بنرسم الابتسامة 
علي الوشوش رغم الوجع
مع انه سايب 100 علامة 
بتقول خلاص مات الجدع 
بنرسم عشان خايفين نبوح 
ما وجع السؤال زي الجروح 
ومفيش اجابة للسؤال
يبقي نداري وبلاش ننوح
وتتحجر فينا الدموع
ماهو اللي راح ملوش رجوع 
والدنيا اخرتها زوال
وشمس تغرب ملهاش سطوع
ويجي ليلك وتكون وحيد 
ومخدتك ع الدمع شاهده
محنا بردو مش من حديد
بس حياتنا هي المعانده
ونصحي تاني من جديد
نهرب في بسمه ونظرة شارده
ونفضل نلف ندور ونحلم
وتمشي الحياه وتمر بينا
وفي الاخر بردو نسلم 
ماهو مفيش حاجه في ايدينا
وتعدي السنين ورا السنين 
نحلم بحضن يكون حنين
ننسي فيه ويضمنا
يرحمنا من وجع الانين
مع اننا مستسلمين