ناس وناس
...............
ناس وناس في دنيتنا
عارفين أسرارنا وحكايتنا
يموت القلب لو غابوا
وتهون عليهم عشرتنا
وناس تتمنى خطاوينا
ونبعد عنهم بإيدينا
بنجرحهم ومش قاصدين
وما نشوفهمش بعينينا
وناس تعدي ما تسلم
وناس بسكوتها تتكلم
وناس لو لقيوا لحظة حب
تسرق قلوبنا ما تعلم
وناس قلوبها مليانه
بطعم الحب عمرانه
وناس لو جيت تحاسبها
أعمالها طالعه خسرانه
وناس في الفقر عايشه
وناس في طريقها ماشيه
وناس في ليل شتاها
في عز البرد سهرانه
وناس في حياتنا كدابه
وناس في اللسته متسابه
يمكن بكرة يجيها الدور
واهي دنيا ودايره بغرابه
وناس حسدانه في كلامنا
وناس بتسرق أحلامنا
ولا يهمها دنيا
ولا حساب يوم القيامه
ناس وناس في دنيتنا...
..........
حمدي رمضان ابوعمرو الريشي
