يا لَمِّة الحرافيش
يا المَنطُورين ع الرَّف
الخُرج عَزمه مافِيش
وفْتِوه ياما إنْزَف
بِتهَيصُوله اليوم
و بُكره تِتبَاكُوا
وتْشُقوا مِنه هُدوم
لو يوم ما عَشَّاكوا
وبتمسِكوا الطَّبله
فى أول المِشوار
وتزَغْرَطوا لعَبله
وتقولوا جِه المِغوار
وف مُنتَصف يُومكُم
البَطن تِهزِمكم
والجُوع يأَزِّمكُم
تِستَتقِلوا السِّكه
تِنشِغْلوا بالفَكَّه
وبتِتلِهوا بالمَم
وورَاكُوا فُرقَه ويَم
والعَالم المَجنون
شايل ضَلال فِرعون
اللى سَرق خيركم
واللى رَدَم بِيركم
واللى سَقَاكوا الوِيل
يااااااااااااااااااارب هذا الليل
ب أشكِى لك الحرافيش
اللى اتعَموا ف الهِيش
وصمتهم خِيبهم
وحِسُّهم عِيبَه
والفارس المجروح
جرحه يِشُق الروح
فَتّ الوَجَع عَزمُه
تاجُه ماعاد لازْمُه
سِيفه عِدِم ناسُه
وخَانُه حُرَّاسُه
قالوا عليه مِهمَار
وهُوه جُوه النار
لكن بِلا دِيَّه
سيفه إنكسر فِيا
يااااااااااااااااااااالعنة الحرافيش
هاقفل عليكى الشِّيش
وأرُد باب دَارى
الفتنه وِيل نارى
والناس بتاكل بعض
نسيوا خلاص الوَعد
وبيقتلوا الأحلام
الرب ما بينام
يااااااااااااااااارب هذا الليل
الهَرْج زاد ف الهِيش
ب أدعى ترُد الوِيل
وأشكى لك الحرافيش
********************
#مى_مرسال