* حس وفيس ولحمة *

 

أستاذي وعزيزي 

بجد أصبتم 

مقدر شعوركم 

واوقع وأبصم 

إن الحكاية 

بقت مش فنون 

يا إما سريقة 

يا فجر ومجون 

وهري ف هري 

وصورة بعري 

أو حرف هايف 

لا طعم لا لون 

وقال والأكادة 

وغيظة بزيادة 

لا همزة ظابطها 

و ة مش رابطها 

وتيجي تعدل 

يقول يا مسهل 

متدقش عليا 

بشوف حواليا 

عدد ف اللمون 

وست تمسي 

يا دوب كلمتين 

محدش عارفها 

تكون هي مين

تلاقي في دقايق 

١٠٠ 

٢٠٠

يردوا التماسي :

قمر قمرين 

فيسك منور 

وخدك مزهر 

و الله أكبر 

جايبينك منين 

وجايز بتضحك 

او قصدي بيضحك 

على المجانين 

وتيجي سيادتك 

تنزل قصيدة 

فيها دم قلبك 

بمتعة فريدة 

بتضحك حزينة 

يا ولاد اللذين

راصين الكراسي 

حولين التماسي 

ولكن ومهما 

بتغريكوا زحمة 

وعيشي وملحي 

وفرحي وجرحي 

وحرفي وشعوري 

مش زي لحمة 

ح أفضل أغني 

وما يهنش فني 

و ح اكتب و ح اكتب 

لنفسي وغيري 

أسرسب شعوري 

وحاكمه ضميري 

قريتم 

سمعتم 

عجبكم 

قاطعتم 

جدتم 

منعتم 

رغم الغيوم 

ح احلق بطيري

 

#عصام_فؤاد

المصدر: آسيا محمد
  • Currently 0/5 Stars.
  • 1 2 3 4 5
0 تصويتات / 136 مشاهدة
نشرت فى 5 نوفمبر 2019 بواسطة nasamat7elfouad

عدد زيارات الموقع

84,394