* تضامناً مع الحملة الناجحة ضد جشع التجار *
( خليها تصدي )
سكوت سكوت سكوت
ومرة واحدة
يعلى الصوت
خف كرشك من قروشنا
ولا بنهبك كده مبسوط؟ !
دست كتير ع الخامس ماشي
بس خلاص لازم ح تهدي
وان مرجعتش بقى عن طمعك
اشربها و خليها تصدي
* * *
والصوت راح يعلى و ح يرج
انزل بقى من فوق البرج
وارضي بحبة بسيطة وماله
مش تفضل دايس ومعدي
دست كتير ع الخامس ماشي
بس خلاص لازم ح تهدي
وان مرجعتش بقى عن طمعك
اشربها و خليها تصدي
* * *
هو عشان ما انا حلمي بسيط
أشتري كاش أو بالتقسيط
ليه تلعب لعبك يا حويط
ليه تقتل أحلامنا الوردي
دست كتير ع الخامس ماشي
بس خلاص لازم ح تهدي
وان مرجعتش بقى عن طمعك
اشربها و خليها تصدي
#عصام_فؤاد
