ثورة التلاميذ

 

(القصة صحيح خيالية لكن هى ردودى على بابا زمان وهو بيشرحلى التاريخ ودايما كنت بلاقى ثورتى على الشعب اكثر ممن حكموه)

فى مدرسة جيل المستقبل الابتدائية ...

من المدارس اللى بتخلد اسم جيل مستقبل جمال وسوزان مبارك مدرسة متميزة الاولاد فيها ممتازين فى تعلم الحاسب والدخول على الانترنت رغم انها مدرسة ابتدائى لكن عقول التلاميذ فيها تسبق سنهم .

فصل خامسة أول الابتدائى فصل مش معقول و كان بيحب مادة التاريخ و طبعا مدرس التاريخ دايما يشيد بالعائلة المباركية و انجازتهم الخارقة فى مصر و كان التلاميذ حافظين الانجازات صم.

طبعا ما هو كتر التكرار يحفظ الشطار و كانت اخر حصة فى التاريخ طبعا عن انجازات مبارك والتقدم الاقتصادى على يد الرئيس و المستقبل الجميل على يد جمال مبارك و بدأ التلاميذ امتحان نصف السنة و فى يوم 25 يناير 2011 قامت الثورة.

و بعد طول انتظار بسبب أحداث الثورة بدأ النصف الثانى من العام الدراسى وكانت أول حصة فى العام حصة التاريخ .

استاذ فكرى : انهاردة يا ولاد أول حصة فى التاريخ بعد قيام الثورة المباركة على الظلم والفساد ، على النظام السابق اللى دمر مصر أقتصاديا و سياسيا و معنويا دى مصر كانت هتضيع لو كان حكمها جمال ....

قال عمرو : 

بس حضرتك ما كنتش بتقول كده قبل الثورة قلت ان جيمى احسن واحد يحكم مصر وانهم عملوا نهضة و كلام كبير كده مش فاكرة.

رد رامى : 

وقلت كمان ان ماما سوزان هى مامتنا و عملت المدرسة دى وكمان القرأة للجميع .

كمل مروان كلامهم : 

احنا كمان لازم نعمل ثورة ...... يسقط تاريخ مبارك .... وهتف كل الطلبة يسقط تاريخ مبارك...... وخرج فصل خامسة اول لحوش المدرسة ووراهم كل المدرسة يسقط تاريخ مبارك .

ا/ فكرى!!!!!!!!!!!!!!

طبعا بسرعة جرى ا/ فكرى على حضرة الناظر يلحق ثورة التلاميذ و نزل ا/ فكرى مع الناظر للولاد فى حوش المدرسة .

الناظر :

يا ولاد اهدوا طلباتكم ايه

التلاميذ :

نلغى تاريخ مبارك لغاية لما يتكتب تاريخة صح

الناظر :

هرفع طلبكم للمديرية المهم ارجعوا الفصول

التلاميذ :

لا مفيش رجوع لغاية لما تنفذوا مطالبنا

الناظر :

خلاص يا ولاد روحوا وبكره تيجوا نبدأ يوم دراسى جديد و انا عن نفسى هنفذ طلبكم انهاردة و قررت الغى تاريخ مبارك وهبلغ المديرية .

التلاميذ فى اليوم التالى :

طلبوا انهم يبدأو بحصة التاريخ

ا/ فكرى فى مكتب الناظر :

يعنى يا حضرة الناظر أشرحلهم ايه احنا كمان معذورين

الناظر :

الولاد معاهم حق إرجع لورا يا ا/ فكرى

ا/ فكرى :

ورايا الحيطة يا فندم

الناظر :

ارجع لتاريخ السادات يا فكرى ماله السادات بطل الحرب والسلام

ا/ فكرى فى الفصل :

انهاردة يا ولاد درسنا عن الرئيس المؤمن ، الرئيس البطل ، بطل الحرب والسلام الرئيس العظيم أنور السادات

عمرو :

لكن مروان دخل على الانترنت و عرف حاجات كتير عن السادات قول يا مروان اللى عرفته

مروان :

السادات هو اللى ضرب اسرائيل و هزمها – طبعا فرح جدا ا/فكرى –

لكن يا خساره مروان كمل كلامه :

ضرب اسرائيل بالطيارات فى ثلث ساعة وجابلنا مبارك وابنه جيمى يضرب فينا 30 سنة هههههههههههههههه 

الفصل :

ههههههههههههههه - الفصل كله ضحك -

رامى كمل كلامه :

ده كمان ضحك على الشعب المصرى فى الاستفتاء علشان ما يكنش فى مدة محددة للرئاسة والشعب وافق علشان المادة الثانية فى الدستور ههههههههههههههههه .

هتف عمرو : 

يسقط تاريخ السادات

و خرج خامسة اول فى مظاهرة وكل المدرسة وراه وكالعادة انتهى اليوم انهم يروحوا ويبدأو تانى يوم اليوم الدراسى بحصة التاريخ

ا/ فكرى فى مكتب الناظر :

انا خلاص كرهت التاريخ و كرهت سنة خامسة اعمل ايه

الناظر :

الولاد معاهم حق ما هو ده الى حصل هنضحك على نفسينا ولا ايه شوف ارجع لورا يا ا/ فكرى دول 7000 سنة ما جاتش على السادات اقولك عندك زعيم الامة جمال عبد الناصر

التلاميذ فى اليوم الثالث  

طلبوا انهم يبدأو بحصة التاريخ

ا/ فكرى فى الفصل :

انهاردة يا ولاد درسنا عن زعيم ما حدش يقدر يكلم عنه كلمة زعيم الامة حبيب الملايين جمال عبد الناصر

مروان :

قول يا رامى اللى عرفته عن عبد الناصر – اترعب ا/ فكرى

رامى :

هو بردوا مش احنا اتهزمنا فى 67 ايام عبد الناصر و بعدين مش هو صاحب الوحش ده اللى اسمه صلاح نصر والوحش التانى شمس بدران و الثالث الفاشل عبد الحكيم عامر

ا/ فكرى :

يا ولاد ده حبيب الملايين و بعدين هو مظلوم فى كل ده

عمرو :

ولما هما بيضحكوا عليه ويعملوا حاجات وحشة كده يبقى ازاى زعيم .... يسقط تاريخ الزعيم يسقط يسقط يسقط

و لليوم الثالث يتعاد نفس سيناريو الثورة

و يطلب الناظر من ا/ فكرى الرجوع لمرحلة تاريخية اقدم و هنا كان الدرس فى اليوم الرابع عن حكم الاتراك لمصر

اليوم الرابع

ا/ فكرى :

انهارده حصة التاريخ عن حكم الاتراك لمصر ........ عصر واحد من افضل من حكموا مصر عصر محمد على حد عنده اعتراض قبل ما نبدأ  .

و هنا

نظرعمرو نظرة قاسية للاستاذ فكرى وقال بلاش اكلم احسن

ا/ فكرى :

مثلث الشر عمرو ومروان ورامى تعبت منكم عايز تقول ايه

عمرو :

انا بجد اللى تعبت من الشعب ده الى كل شوية يضحك عليه مش الاتراك دول الى حكموا مصر من 1520 لغاية ما فاروق عملوله ثورة ومشوه دول نهبوا ثروات الشعب

ولكن مروان ورامى هتفوا هتاف غريب .... يسقط يسقط الشعب المصرى

و كانت المظاهرة فى الحوش اليوم ده كبيرة جدا ونزل الناظر وكل المدرسين يسألوا ليه الشعب هو الى يسقط

التلاميذ :

علشان كل شوية يضحك عليه ! مره يسرقوه ومرة يحتلوه و على طول كده الشعب يضحك عليه وهو مش فاهم حاجة

الناظر :

عيب يا ولاد الشعب المصرى عظيم لكن طيب

التلاميذ :

دى مش طيبة دى خيبة

و انتهى اليوم الرابع نفس النهاية واتفق الناظر مع ا/ فكرى ان اليوم الخامس يكون عن أعظم تاريخ ..... تاريخ الفراعنة

و فى اليوم الخامس

ا/ فكرى :

درس النهاردة عن أعظم حضارة فى العالم حضارة عمرها 7000 سنة حضارة الفراعنة

ولكن ما لحقش ا/ فكرى يكمل كلامة رفع مروان صابعة و هو مبتسم ابتسامه كلها رضا و براءة : ممكن اقول كلمة

سمح له ا/ فكرى يكلم : 

قال مروان .. الفراعنة يا ولاد حضارة عظيمة بنوا الاهرامات والمعابد وكان الحاكم هو الفرعون – طبعا فرح جدا ا/ فكرى –

 كمل مروان كلامة : 

الفراعنة كانوا بيعتبروا الفرعون ده هو الاله والشعب الغريب ده كان بيقول مات الملك يحيى الملك والى كان بيقول ان الاله مش الفرعون بيموت و بردوا الشعب خايف ومصدق ان الفرعون هو الاله انا مش عارف ايه الشعب ده

وخرجت ثورة قوية من الفصل يسقط يسقط يسقط الشعب المصرى

يسقط الشعب الفكسان هتاف غريب للتلاميذ .... و الغريبة انهم اصروا يمشوا فى مسيرة لغاية رئيس الوزارة

الناظر طلب تدخل الوزارة وكان مشهد غريب

وصلت مدرعة من الجيش للمدرسة لحماية مسيرة التلاميذ وحمل ظابط الجيش مروان فوق الاعناق بيهتف يسقط الشعب الفكسان ومشيت المسيرة لغاية رئيس الوزارة

الاغرب انهم امام مبنى الوزارة هتفوا - هو يمشى مش هنمشى - كل الناس الى فى الشارع الى مرت عليهم المظاهرة سألو من الشعب الفكسان وموجود فين على الخريطة ومين هو الى يمشى رئيس الوزارة ولا مبارك و لا المجلس العسكرى .

رئيس الوزارة :

خير يا ولاد عاملين ثورة ليه

مروان :

احنا عاملين ثورة على الشعب الفكسان ده كل لما حد يجى يحكم البلد يضحك عليه وهو كده عادى خالص كل شوية يضحك عليه

رئيس الوزارة :

يا ولاد شعب مصر طيب ولكن دلوقتى هو نفسه عمل ثورة عظيمة وهيبدأ بداية جديدة

التلاميذ :

هو يمشى مش هنمشى

رئيس الوزارة :

فى حد يطرد ابوه وامه من البلد مش البلد دى اهلها هما ابويا وامى واهلى عيب يا ولاد وصدقونى مصر هتتغير ... شوفوا انا عايزكم تدرسوا التاريخ كويس و ادرسوا حتى الى مش عاجبكم فيه علشان ما تعملوش زيه تانى لما تعرفوا ايه الغلط هتتعلموا تعملوا الصح

و انتهى العام الدراسى لمدرسة جيل المستقبل معتمدا على نتيجة الفصل الاول من العام الدراسى

العام الجديد 

و فى العام الدراسى التالى اصبح تلاميذ خامسة أول هما تلاميذ سادسة اول و كانت أول حصة هى حصة اللغة العربية وكان موضوع تعبير عن اول انتخابات بعد الثورة وكانت المدرسة مس تهانى

مس تهانى :

يا ولاد موضوع انهاردة عن اول انتخابات بعد الثورة عارفين مين الى فاز فى الانتخابات رفع مروان ايده وقال ايوه الحرية والعدالة

مس تهانى :

طيب مين شاطر عارف مين هما الحرية والعدالة

رامى :

الاخوان المسلمين

مس تهانى :

طيب مين اشطر يعرف مين هما الاخوان المسلمين

عمرو :

انا دخلت على الانترنت وعرفت حاجات كثير ههههههههههههههه اقول ؟

مس تهانى :

طبعا يا حبيبى قول

عمرو :

هما الى موتوا محمود فهمى النقراشى باشا

مس تهانى

جالها ذهول .... يا ولاد ايه الكلام ده

عمرو :

اصل اللى موتوهم كانوا كثير تقريبا كده 25 واحد ضربوهم بالنار انا هحفظ ايه ولا ايه ههههههههههههههه

مس تهانى :

يا ولاد الاخوان المسلمين عملوا مشروعات جميلة للبلد

ولكن مروان قال لرامى :

بقولك ايه البلد دى مفيش فايدة فيها والشعب ده حالته صعبه خالص احنا نكبر دماغنا منهم

رامى :

فعلا معك حق هو احنا عايزين ايه غير الشهادة علشان نروح اعدادى

رامى :

مس تهانى معلش هو عمرو دايما كده اقعد يا عمرو الاخوان المسلمين عملوا عيادات للفقراء ووزعوا سكر و زيت ومكرونه فى الانتخابات و طول السنة يعنى ............

مس تهانى :

شاطرين يا ولاد برافوا مصر اكيد هتتغير على ايد الاخوان

مصر هى الاخوان المسلمين