فى غيطنا توتة مستحيل هاتموت
وهاتبقى دايما بِكْر طرّاحة
بتجود بتوتها فى أوان التوت
وف غير أوانه ضلها راحة !
---------------------------------
يوم بعد يوم عمّال اقطّع ورق
من النتيجة النايمة فوق مكتبى
وبمنطق الغرقان قبل الغرق
باقول لنفسى : لسه قلبى صبى !
---------------------------------
باحب صوت الناى يقول الصَّبا
ويلمس الجرح الخفى فىّ
شبابى ضاع منى وقبله الصِّبا
ولسه أحلامى كما هىَّ !
--------------------------------
جرّبت مليون طعم للحرمان
وعرفت فيك الوحدة فى اللمة
لقيت أمرّ وأقسى شئ يا زمان
حرمانى من إنى أقول : يامّه !
-------------------------------------
لقيت أخيرا شقة شيك تمليك
وعندى فيها كل ما اتمنيت
وفجأة صحّانى أدان الديك
رجعت تانى نمت واتغطيت !
--------------------------------------
حطيت ايديه فوق ودانى التقيت
كل الوجود ساكت ؛ صرخت وجريت
رجعت تانى للضجيج والزحام
سعيد كأنى بعد موت احتييت !
-------------------------------------
ليه تشمتوا فىّ عشان انكسرت
وليه تداروا الفرحة تحت الدموع ؟
ماتفرحوش لأنى برضه انتصرت
لولا ارتفاعى لم عرفت الوقوع !
--------------------------------------
المّّيّه إكسير الحياة والنما
وفيها كل الخير لنا ، إنما
صنعنا م الميه قنابل تبيد
كيان بنفس الميه شب ونما !
--------------------------------------
فى الصيف نحن قوى لبرد الشتا
وفى الشتا نشتاق لشرد الصيف
لكن ضرورى نلاقى صيف وشتا
عشان نعيش لمسة حنان ورغيف !
--------------------------------------
لو كنت عارف كل حاجة وحويط
هسأل سؤال حاول تجاوب عليه
ليه القمر أيام ما كان فى المحيط
ما كانش بينوّر لنا الدنيا ليه ؟!
-------------------------------------
سألته ينصحنى وقال الحكيم
خاف من صديقك يا ابنى ، قلت ازاى ؟
قاللى عدوّك يبقى صاحب حميم
لما يكون كدّاب ومش نسّاى !
-----------------------------------
شبّى لفوق يا نخلة واتدللى
أصيلة فرعك فى العلالى عِلى
ومهما كان يا نخلة تمرك قليل
كفاية إنك فوقنا بتضّللى !
-------------------------
مولود أنا يا صاحبى فى حارة سد
فيها الخلايق روح فى مليون جسد
بنحب فيها الخير لنا كلنا
وعمرنا ما عرفنا معنى الحسد !
-----------------------------------
علّوا القلوع وقدِّفوا ما تخافوش
لازم نصد الريح ولازم نحوش
إذا تركنا الدفة من يدّنا
مصير قضيتنا ها تطلع فاشوش !
-----------------------------------
ويوم رحيلى أمانة يا صُحبتى
لتدفنوا ويّايا فى القبر ضىّ
يمكن ألاقى ف قبرى وف وحدتى
حقيقة تاهت منى حيث كنت حىّ !
-----------------------------------
زمان زمان ، من ألف مليون سنة
أيام لا كنتى انتى ولا كنت انا
روحك وروحى اتقابلوا فوق السحاب
ومن يوميها كان ميلاد حبنا !
----------------------------------
نقشت اسمك وشم فى جبينى
وشلت صورتك بين رموش عينى
وكل أملى انى احبك وبس
ومش مهم كمان تحبينى !
---------------------------------
قال الكرامة ، قلت له دُرّة
من عاش مايملكهاش لا مات ولا عاش
قال الحقيقة ، قلت له مُرّة
وأمرّ منها لما مانفولهاش !
-------------------------------
محبوس فى قلب القمقم الجنى
حاله كدا وازاى هايعينّىِ
ويحقق الحلم اللى باتمناه
وهو نفسه أولى بيه منى!
-----------------------------------
هو انقتل واحنا بنسألها مين
اللى قتل ؟ وسؤالنا حيران حزين
وبهية لم قال ومرت سنين
ماتكونش ليه هى اللى قتلت ياسين ؟!
-----------------------------------
القبر متر ف متر ياللعجب
وفيه ألوف آخر هدوء وانسجام
والدنيا واسعة وزحمة ، هل فيه سبب
غير إن أطماعنا اللى عاملة الزحام ؟!
------------------------------------
الدنيا من غير حب وهم وسراب
والعمر من غير حب رحلة عذاب
ولو يعيش إنسان هذا الزمن
بالحب مش ممكن يشيب فى الشباب !
------------------------------------
فى هذا الديوان تسربت الحكمة صافية تحت جلد الشعرووصل الشعر إلى درجة عالية من الاقتصاد فى التعامل مع اللغة دون غموض أو إبهام ، فالشكل الفنى الذى اختاره الشاعر من أصعب الأشكال لضيق ما يحتله من مساحة واتساع ما يعطيه من معان وإيحاءات وظلالوعندما أقدم سيد الموجى إنما أقدم أحد الأأصوات الشعرية المميزةمن أبناء جيلى الذين عاصروا كل التناقضات التى مر بها الوطنوعانوا منها معاناة جعلت لشعرهم مذاقه وحساسيته الخاصةوبالقطع لايكفى هذا الحيز لتقديم الشاعر أو ديوانه بقدر ما يتسع لكلمة عن جوهر ما يحتويه الديوان . وأرى أن الجوهر الحقيقى الذى يشع من بين سطوره هو الصدق
فؤاد حجاج
رقم الإيداع بدار الكتب 4927 لسنة 1985 م
مطبعة حنان / شارع الجيش القاهرة