جارى التحميل
استخدم زر ESC أو رجوع للعودة
امسحى دموعك يا أمى ، مافيش شهيد
حد يبكى عليه ، عشان هو الوحيد
اللى رب العزة بيقول إنه حىّ
واللى جىّ يا أمى م الأيام أكيد
عمره ما هايبقى حزين زى اللى فات
انسى يا أمى هموم الذكريات
وافرحى ، ولى خلاص زمن الآهات
وابتدا عيدنا اللى كان دايما بعيد !
**
امسحى دموعك يا أمى الفجر لاح
والسواد اللى حجب شمس الصباح
عننا تلاتين سنة هايكون خَضَار
سندسى ويلوّن الأرض البراح
العيدان مابقاش ينخور فيها سوس
أو ديدان سعرانة وانزاح الكابوس
واللى باعوا مصر بتراب الفلوس
مستحيل هانقول لهم أبدا سماح !
**
امسحى دموعك يا أمى يا أغلى أم
اصبرى وما تحمليش من بعدى هم
اللى حوليك دول ولادك كلهم
بس برضه بافكرك فيه تار ودم
محتاجين إصرار من الثوار وهمّة
مهما هاتكون صعبة يا أمى المهمة
بكرة تنزاح كل غمة طول ما هُمّا
مصر جواهم نشيد حافضينه صم !
**
امسحى دموعك يا أمى بلاش حداد
دا انتى أم شهيد بروحه لمصر جاد
ريحينى يا أمى وبلاش الدموع
مش كفاية خلفت وياكى الميعاد
كان منايا يا أمى أختار لك هدية
زى كل سنة واقدمها بإيديّا
بس فرعون والديول والبلطجية
لوّنوا فرحة لُقانا بالسواد !
**
امسحى دموعك يا أمى ، أنا ابتديت
رحلة التغيير من التحرير ، يا ريت
يكمل المشوار يا أمى وتاخدوا تار
الضحايا المكلومين فى كل بيت
خلوا بالكم ، لسه للمخلوع ديول
لسه حواليكم وبينكم ألف غول
لسه مصر بتتولد ، لسه الوصول
للهدف قصة يطول عنها الحديت !
2012 م
