جارى التحميل
استخدم زر ESC أو رجوع للعودة
<!--<!--
![]()
راجع إليكى بشوقى ضمينى
وماتقفليش يامه فى وشى الباب
ارخى جريد نخلك يغطينى
دى الغربة ليل قاسى على الأغراب
مجروح ومحتاج لك تداوينى
كم جرح قبلى مسه نيلك طاب
من بعد طول التوهة دلينى
وحشانى يامه لمة الأحباب !
****
نسّينى يا مه غربتى لما
دقيت على باب السفر ومشيت
ولقيتنى تايه وحدى فى اللمة
على طريق من غير صديق ولا بيت
سافرت طاير بجناحات أحلام
اتكسرت يامه مع الأيام
سامحينى يامه خلى جرحى ينام
من غير ألم من غير ندم وعتاب !
****
مشتاق قوى للناى وللأرغول
مشتاق لأيام الصِّبا جنبك
وكنت اضم الراديو لما يقول
اسمك واغمض عينى واحلم بك
دا انتى الحقيقة الباقية طول المدى
وانتى اكتمال البدر لما بدا
وعم نجم سبق وقال فيك كدا
الدنيا شابت وانتى لسه شباب !
****
واحشنى يا مه سلسبيل نيلك
شريان حياة طول الزمن بيجود
واحشنى سحر الليل فى مواويلك
بحة ناياتك واخضرار العود
الناس فى حضنك يا مّه غير الناس
والبدر غير فى سماكى مش وناس
وياقولها يامه صادق الإحساس
فى البعد عنك كل حلم سراب
****
راجع بنبض الصدق جوايا
راجع لعزوة ناسى ، أوفى الناس
لسه قنايتك يامه روّاية
ولسه حاضن بين إيديه الفاس
يكفينى حفانين قمح من خيرك
ولا ألف كيلة من غيطان غيرك
يكفينى أرجع لك دا انا طيرك
العاصى عاد من تانى بعد ما تاب !
****
هابنى لى بيت اخضر فى حضن النيل
يتمايل الصفصاف على بابه
وهانوّره بالحُب والمواويل
ومش هافرّط يامه فى ترابه
واعلم ابنى يحفظه ويراعيه
ويصونه دايما زى حبة عينيه
ومهما حِمْل الدنيا يتقل عليه
يسأل وهيلاقى فى نيله جواب !
1979 م
