يا كريم أجبرنا... الشاعر /عاطف حارس نور

جديده يا سنه ولا نُسخه بتتكرر
معاكي ليّٰ فرحه ولا هم راح يكتر
يا تاريخ أتبسم أرضى و راضيني
يا يناير تعالى وردي بحلم أخضر
كم مره تيجي يا يناير و تغريني
و أنا زي طفل بستناك و بستنظر
شوف حنيني شوف فيّ عيني
شوف أحتياجي لفرحه مش أكتر
على أعتاب السعاده مره خليني
أنا تعبت واقف قدام باب متسكر
ملامحي شاخت و معاها تكويني
باقي ليّ فتافيت من حلم متكسر
أيدي ياما كسفتها و أنت تعديني
و تمُر من قدامي كما سحاب تُعبر
43 يناير يا يناير و لسه ناسيني
كبر عمري و حلمي صار أصغر
ما يعنيني إللي كان قبل يعنيني
حتى أفكاري كل يوم زيي بتتغير
ليه تروح و عاللي بعدك بترميني
ليه الأماني ترميها و بيٰ تستهتر
هات لي معك جرام فرحه هاديني
أو هات مع المرار حبه من السُكر
أنا ماليك أمل و أنت يأس ماليني
لين قلبك شويه يا قاسي أتغير
أنا رايح لربي و هو بيعطيني
خيرهُ على الأرض دايماً مُمطر
عظيم ربي أكيد ما راح يشقيني
و لا راح يرُدني أبد خايب و متكدر
عالم يا رب سنين الناس وسنيني
طرقنا بابك يا كريم أجبُرنا أجبُر