بختك كده
بقلم تامر النقيب
_____________________
مبقتش عارف أنام ولا أدوق النوم
وضلوعى منى مشقلبه متغلفه بكل االهموم
والدمعه حراقه وساكنه بالعيون
وكل حاجه مغصبه وراح كمان منى الصبا
حتى الوجع جواى خلاص قلب النهار بغيوم

بختك كده ،،،، جيتينى بعد دمار
وحياتى منى مكعبله وعايش حمار
ولاحتى قادر أعيش فرح
والحزن جوايا طرح أجدع ثمار

العيب مهو ش على الدنيا البغيضه
العيب دة جوايا أنا --أنا اللى ليا كام سنه
حياتى هم وعكننه وليلى نهار

كان عشمى إنك تتحملينى
وتشيلى فوق منى الجلخ
وإنك تكونى ضى عينى
لو حتى منك هنسلخ

هو إنتى ليه مستحمله بعدى وفراقى
طبع الخيانه مهوش صفه ولا حتى دائى
أنا بس عيشت محروم م الأمان
وعشت وسط الناس سنين لكن جبان
والكل كان بيقول عليا واد عبيط
والطيبه مرفوضه فى زمنا
ملعون أبو هذا الزمان

أنا عيشت طفل منزوع القرار
وكنت أخاف أقول أنا
عاوز أنا -- وبستخبى ف الجدار
كل حياتى عيشتها خايف بجلدى
الضرب والخوف والإهانه
من عمامى ويا جدى
وعشان أبويا كان حنين
كان يقولي خلاص ياولدى
دول برضو أهلك مهما كان الإنكسار

مكتوب عليكي تحبي واحد
قلبه كان زى الحجر
لاعمره عارف مرة يضحك
ولاحتى يحزن ولا يكون زى البشر
عاش الحياه بالانتقام
ولا عمره يوم عرف السلام
ولا حتى رمشه مرة نام
بس الحقيقه جوة منه يوم ماحبك
إنك بقيتى بدنيته أجمل قدر
وأحلى من كل الكلام

الذنب مش فيا أنا --
ولا حتى فيكي ولا حتى ف اللايمين
الذنب كله جوه دايره الماضى اللعين
اللى خلانى أعيش لوحدى من سنين
واللى خلانى كمان عايش كما الطير الحزين
اللى مكسور الجناح واللى مش لاقى براح
دايما بيشكى وجعته جوة ليل المدبوحين

عارف أنا قلبك دهب مليان بحب
حبيتى واحد جوة منه كتير تعب
حظك بقى تتحملى وتنضفيه
وتجمليه وتزينيه من غير عتب
كل البنات قبلك باعونى
واللى جرحت واللى خانت
واللى ياما كتير سابونى
روحى إفتحى اوضتى بقى
حتى ودرج المكتبه
وعدى عندى الجوابات
شوفى الهدايا والحاجات
هتلاقى أكتر من صبيه
اللى سمرة واللى بيضه
واللى كات عيونها خضرا
واللى سودا وعسليه
وأهو كله أصبح ذكريات
واهو كله باعنى يوم وفات
صدقينى الماضى مات
وحبك إنتى اللى باقى
واللى باقى ليا إنتى
وإنتى والله ياحبييتى
ست الصبايا والبنات

المهم إنى خلاص
مابقتش قادر أحب غيرك
ولا قادر أنى أشوف بديلك
عودت جسمى على السهر
بقى جوة ليلك
واحكى الحكاوى والغناوى كلها
فى جمال عيونك
أنا نفسى أشرب بس مره سلسبيلك
انا قلبى ساحه للغرام
مرصوف حنينك
صدقيهم لو قالوا عنى
إنى معدوم الضمير
وصدقيهم لو قالولك كان فلاتى
بتاع حريم أوكان أمير
صدقيهم لو قالولك أى حاجه وقصه عنى
صدقيهم لو يعدوا ذنوبى ليكي
ماهو ربنا برضو كبير
هو بيسامح ويغفر
هو لذنوبنا بيستر
أما إحنا برضو فى الاخر بشر
فعشانى سامحى وإغفرى
دة أنا اللى حبيتك بعمرى
وعيشت وياكي أسير

خلاص بقيت عايش فى بعدك
جوه منى الف نار
عايش كما بركان ألم
حوليا ميت مليون حصار
إغفريلى الماضى
وإغفريلى الذكريات
خلاص منيش عاوز سواكي
وكل شئ من يوم ماحبيتك أنا والله مات
________

تامر النقيب -----من مؤلفاتى وليس منقولا