مجلة عشـــاق الشعـــر الإلكترونية (ممدوح حنفي)
للخال الابنودى بمناسبة الاربعين والتابين وفتح متحف ابنود
_____________________________
تصدق
ما شفتكش فشفتك
شفتك ع الحيطان ف رسمك
وحجر مرسوم على وشك
شفتك فى كل الحاجات
وشفت كمان جمالات
وحراجى بيوزع الجوابات
شفتك علينا بتبص
وبتقول هس
اسمعوا الحكايات
وريحتك كات مالية المكان
وصوتك مالى الودان
رغم الاحزان
انا شفت ضحكتك
شفتك عريس راكب حصان
ولا ابو زيد
عمال تقول وتعيد
والخلق كله هيمان
اوعاك تقول مجنون
انا مش مجنون للعلم
اوعاك تقول دا حلم
ازاى شفت واحد مات
انت ما ممتش
عمرك شفت كتاب بيموت؟
ايه بتقول ايه..عندك حق
الكتاب ما بيموتش
مش عندى حق بالذمة
وانت كتاب
مش بقولك شفتك
واللى كان موجود وما شافكش
يبقى اكيد اعمى
الشاعر عبد الله الهوارى قنا قوص جرا جوس
ساحة النقاش