مجلة عشـــاق الشعـــر الإلكترونية (ممدوح حنفي)
عم سعيد بياع الفول
( زجل ) بقلم د عبدالله منصور
_____________
عم سعيد بياع الفول_ عمال بينادى ويقول
:معانا الفول مدمس_ مكمورة ياجعان غمس
، يابختك ياللى تنول
لابس على صدره فوطة_ ورا ضهره مربوطة
وبيضا زى الفل _ ... قدامه طرشى وخل
، ومقطع القوطة
مزوق عربيته اليد _ رزق ولاده ووش السعد
يرفع غطا القدرة بايد _ ويمسك الكبشة بايد
،والمواعين حواليه تتمد
زبون يقول انا من بعيد _.. مشينى ياعم سعيد
وزبون يقول: حط لمون_وزبون يقول كتر كمون
دا الكمون صحى ومفيد
وزبون يقولّه :يابو امين_ بلاش تحطلى زيت تموين
وضّبه بطحينة وزيت حار_وهات مكان الطرشى خيار
يقولّه من عينى الاتنين
..الله ع الفول بالشطة_ مع لقمة ودن قطة
توصل للبق بشوق _ يستطعمها اللى يدوق
بجنية يكفى قورطة
حبات الفول دى لوز_ تغذى اللى يعوز
تاكل منه وتفّول _ تصبح ااقوى من الأول
ولا اللحمة الكندوز !
الفول غذا للعقول _ لو تقدر تنكر ..قول
لحم اكتافنا من خيرة مفيش بديل لنا غيره
للغلبان واللى يعول
ع الضهرتفضى قدرته_ وسعيد... ينهى مهمته
فيشترى فاكهة وخضار_ولحمة يرجع بيها الدار
عشان يغذى اسرته!
ساحة النقاش