شرح بسيط لقانون الضرائب العقارية

- قانون الضرائب العقاريه و ضرورة دفع المواطنين للضريبة  اللي عندهم مساكن ثمنها فوق 2 مليون، وحتى الي هياخدوا إعفاء لازم برضوا يروحوا يسجلوا عقاراتهم في مكتب الضرائب العقارية التابعين له.

*إيه القانون ده؟

- قانون الضرائب العقارية هو قانون صدر في سنة 2008، ويعتبر امتداد لقانون قديم اسمه قانون "العوايد" صادر من سنة 1954، وكان بموجبه الناس بتدفع ضرائب على مساكنها.

- القانون لما صدر عمل ضجة كبيرة وكان في شكاوى كتير منه، الحكومة ركنته ومفعلتش منه غير مواد المصالحة مع المجتمع في القضايا اللي تبع القانون القديم.

- في أغسطس 2014، الرئيس السيسي أصدر قرار بتعديل بعض أحكام القانون ده، وتم البدء في تفعيل القانون وتحصيل الضريبة العقارية.

*الضريبة دي بتشمل المساكن ولا أي عقار؟

- الضريبة دي بتشمل كل أنواع العقارات المبنية في مصر (ما عدا غير الخاضعة للضريبة)، يعني تشمل  مساكن خاصة أو وحدات إدارية وتجارية أو شاليهات أو عوامات، وبتشمل كمان الأراضي الفاضية المستغلة جراجات أو مشاتل أو غيره.
 
*امتى بيدفع المواطن ضريبة على العقار؟

- المواطن بيدفع الضريبة لو قيمة الوحدة العقارية السكنية بتاعته تجاوزت 2 مليون جنيه أي ما يساوي قيمة إيجارية سنوية أكتر من 24 ألف جنيه، أما لو قيمة وحدته أقل من 2 مليون جنيه مبيدفعش ضريبة عليها إلا لو كان بيمتلك أكتر من وحدة عقارية.

- يعني لو إنت عندك وحدة عقارية سكنية واحدة قيمتها 1.5 مليون جنيه فبيتم حساب إن قيمة إيجارها السنوي أقل من 24 ألف جنيه فمش هتدفع عليها ضريبة، أما لو عندك وحدتين عقاريتين سكنيتين مجموع قيمتهم 1.5 مليون جنيه، وحدة واحدة منهم بس اللي هتتعفى من الضريبة والتانية هيدفع عليها.

- أما لو سعر وحدتك السكنية مثلًا 3 مليون جنيه، فبيتم إعفاء أول 2 مليون جنيه من الضريبة، وبتدفع ضريبة على المليون الزيادة.

- لكن مش معنى إن سعر وحدتك السكنية أقل من 2 مليون، إنك متتقدمش للضرايب العقارية بإقرار، لأ، إنت لازم تتقدم وتسجل عقارك عندهم.

- الكلام ده خاص بالوحدة العقارية السكنية أما التجارية والإدارية وغيرها بيندفع عليها ضريبة طالما سعرها تجاوز 100 ألف جنيه أو لو قيمتها الإيجارية في السنة تجاوزت 1200 جنيه.

**مين اللي بيحدد قيمة العقارات؟

- في لجان مشكلة في كل محافظة مسؤوليتها تحديد سعر العقار وفق معايير محددة زي الحي اللي هي فيه، واتساع الشارع قدامها، ومدى وصول الخدمات لها، ومستوى البناء ( فاخر/ فوق المتوسط/ متوسط/ اقتصادي/ شعبي).

- والناس اللي بتتظلم من تقدير سعر عقارها وحاسه إنه تم المبالغة فيها، ممكن تتقدم بطعن على تقدير اللجنة.

**إزاي أحسب قيمة الضريبة اللي المفروض أدفعها؟

سعر الضريبة بيكون 10% من القيمة الإيجارية السنوية للوحدة، بعد خصم 30% مصاريف للوحدة السكنية، 32% للوحدة غير السكنية.

- يعني لو إنت عندك مثلًا وحدة سكنية خاصة بك بـ2 مليون جنيه، وقيمتها الإيجارية السنوية 36 ألف جنيه، هيتم حسابها كالتالي:

صافي القيمة الإيجارية السنوية = القيمة الإيجارية السنوية * 70%
صافي القيمة الإيجارية السنوية = 36000 * 70 % = 25200 جنيه
وعاء الضريبة = صافى القيمة الإيجارية السنوية – حد الإعفاء
وعاء الضريبة = 25200 - 24000 = 1200 جنيه
الضريبة = وعاء الضريبة * 10 %
الضريبة = 1200 * 10 % = 120 جنيه سنويًا

- أما لو عندك أكتر من وحدة سكنية، فبيتم إعفاء وحدة منهم والتانية بتدفع ضريبة كالتالي بفرض إن قيمتها الإيجارية السنوية لها 36 ألف جنيه:

صافى القيمة الإيجارية السنوية = القيمة الإيجارية السنوية * 70 %
صافى القيمة الإيجارية السنوية = 36000 * 70 % = 25200 جنيه
الضريبة = وعاء الضريبة * 10 %
الضريبة = 25200 * 10 % = 2520 جنيه سنويًا

- ولو عندك وحدة عقارية غير سكنية (إدارية/ تجارية….) وقيمتها الإيجارية في السنة 2700 جنيه مثلًا، فإنت هتدفع كالتالي:

صافى القيمة الإيجارية السنوية = القيمة الإيجارية السنوية * 68 %
صافى القيمة الإيجارية السنوية = 2700 * 68 % = 1836جنيه
وعاء الضريبة = صافى القيمة الإيجارية السنوية – حد الإعفاء
وعاء الضريبة = 1836- 1200 = 636 جنيه
الضريبة = وعاء الضريبة * 10 %
الضريبة = 636 * 10 % = 63.6 جنيه سنويًا

** مين المفروض يدفع الضريبة المالك ولا المستأجر؟

المفروض مالك العقار اللي عليه ضريبة سواء كان سكني أو تجاري هو المسؤول عن سداد الضريبة العقارية، أما المستأجر فلا يعد مكلف بأداء الضريبة العقارية، لكن بيعد متضامن مع مالك العقار في سداد الضريبة في حدود الأجرة المستحقة عليه.

يعني لو مالك العقار مدفعش الضريبة المستحقة عليه، يحق للضرائب العقارية تاخدها من المستأجر وتعطيه إيصال بها والمستأجر يخصم قيمتها من الإيجار للمالك.

**امتى آخر ميعاد لتسجيل الوحدات العقارية قبل الغرامة؟

اللي عنده وحدة عقارية سكنية واحدة، ومتأكد إن قيمتها أقل من 2 مليون جنيه، متاح له لحد آخر السنة يسجل وحدته في مصلحة الضرائب العقارية بدون غرامة.

أما لو إنت عندك أكتر من وحدة، أو قيمة وحدتك تجاوزت 2 مليون جنيه، فلازم تروح قبل يوم 15 أغسطس عشان متدفعش غرامة.

إيه مواعيد سداد الضريبة؟

تستحق الضريبة العقارية في أول يناير من كل سنة، وتحصل على قسطين متساويين، الأول حتى نهاية شهر يونيو، والثاني حتى نهاية شهر ديسمبر خلال نفس السنة، ويجوز سدادها بالكامل في ميعاد سداد القسط الأول.
كمان ممكن يتم التقسيط الشهري، حسب كلام رئيسة مصلحة الضرائب العقارية.

محاسب قانونى

مجدى محمد نجيب

01001120339

346 ش السودان المهندسين الجيزة