من ألف سنه مسكون بالحُزن
من ألف سنه نِفسى اتكلِّم
نِفسى اخرُج من مُوتى
أسمَعْ صوتى
آخدُه بالحُضن.
======
ولاحاشنى عنَّك غيرَك
أنا واحد من عُشَّاقك
واحد من ملايين ملايينَك
علِّمت جبينى يكون عالى زىّ جبينَك
علِّمت سنينى تكون خضرا..
مزروع فيها شجر ياسمينَك
أرجوك تسامِحنى ان كنت بحِبَّك بجنون..
أرجوك تسامِحنى انّ انا مجنونَك.
=======
الأشواق زىّ الورده المَحروقه..
قايده..نار..
ساديَّه
بتعَذِّب،وبتِجْلِدْ..
والعين زىّ القطّاره
بتمطَّر أمطار
بتخلّى السما بتقرَّب..وبتِبعِدْ..
أصل العين ـ ياحبيب العين ـ
زىّ السِتّ الولّاده
بتِقْدَرْ تصرُخ،،
وبتِقدَر..تِولِدْ...
مهما تكون الأسوار.
=======
بَعْدَك ياجمال
الضلمه مغرَّقه بحر الدنيا
والنور..إسود..
حتى ان كانت الدنيا نهار...
=======
السما باعتالنا رسايل
مكتوبه،،
لكن مش بالحِبر:
"إتّحْدوا"
     لحْسَنْ َيبْقى مصيركو
زىّ مصير الأسماك
لو طِلعِت م البَحر.
=======
إنتَ اللى مخلّى حياتنا بنقدر نِستحْمِلها
وانتَ..أبونا ..اللى بقينا من بَعدَك يُتَما
بَعدَك ياجمال
النظره بقت زىّ رُصاصه
واللُقمه بدمعِنا مِتعاصه
وبقينا ..كُلِّنا..أهداف للقنّاصه
بَعدَك ياجمال
المصريين بيرفُّو،،
واحِد،
ورا واحِد
والشُهَدا كتير جداً
والخَونه مش بيفرَّقو
بين الثاير ،والفاجر ،والعابد
بعدك ياحبيبى ،وحبيب أشواقى
مابقاش فيه شىء باقى
على أوراقى
إلا خطاوى عزرائيل،
والحُزن الخالد..
=======
بعدك ياجمال
الخوف مِنِّنا مابقاش بيخاف
والعُمر الموجوع
زىّ الزمن المسروع
زىّ الريح،
والديب،
والجَرح...بيعوى/زىّ "الإسعاف"/
جسمِنا جَفّ،وخَفّ،وشَفّ
قرَّبتِ الروح من جوّانا
إنّها ..تِتْشاف..
=======
الياسمين مجروح
والسِّرّ المستور أصبَح مفضوح
والصمت بيتألِّم ويبوح
والموت داخِل حرب خسيسه،خبيثه
ويّانا
والخُوف عامِل حرب استِنزاف..
العيش بياكُلنا حاف
والحَرّ مغطّينا فى الصيف..بلحاف
والبرد معرّينا فى الشتا ع الارصفه
أو تحت الكوبرى
وبقينا
صِفر على شمال الواحِد
زائد
صِفر على شمال الواحِد
زائد صِفر بينْضاف
حرب استِنزاف
نفسيّه،وعصبيّه،وصحِيّه
وتراب ،،
زىّ شريط القطر،
وزىّ شريط تسجيل،
سفّاف...
=======
بَعْدَك ياجمال
يا قايم من بين الأموات
إحنا بقينا خيالات
ويادوب منظر
وبنستنظر
حسَنه قليله من الجمعيّات الخيريّه
مابقيناش عارفين الفرق
مابين ساعة المغرب
ومابين ساعة الفجريّه
أوجاعنا وآهاتنا الخَرسَا المكبوته
زىّ رياح الأحزان لمّا بتِرقَع زغروته
مابقاش فيه وَرد جناين
إلا وباين
لونُه اصفَرّ
من كُتر مادَبَحو الورد فى عِزّ الضُهر
مابقاش لينا ضَهر
وحياتنا كُلّها حدّوته.
==========
بَعْدَك ياجمال
الصمت مالينا بقينا بنِسمَع صُوتُه
عامِل زيطه..
وأبو الهول الصابر
عَزمو عليه بسيجار كُوبى
وحطّو فوق راسُه
عِمّه
وفوقيها..بُرنيطه..
==========
والأهرام
عايزين يشيلوها لإن حرام
والآثار مسروقه ليل وضلام.
مابقيتش فى رمضان حِلوه الأيّام
ولاحِلوه السِهرايه
مابقاش فيه نُقطِة ميّه
فى الكُوبّايه
مابقاش فيه دقّه توحِّد..
جُوّا القلب..
وبنِسأل،،،واحنا الأجمل،،،
من كلّ اللى بنِسأل عنهم
وبنِشْحَت،،،
واحنا الأغنَى،،،
من كلّ اللى بنِشْحَتْ منهم...
وبنتحسَّر على أيّامَك
وان نِمنا بنحلَم أحلامَك
واحنا شايفين حوالينا النهبْ
والسلبْ
والسَّبّ
وبقينا ملطَشَه..لولاد الكلبْ..
=========
ياجمال
يااللى بنشتاق لَك شوق الصَحَرا للرياحين
يااللى كنت تدارى علينا وتحمينا
من غَدر السكّين
يااللى انتَ ـ وبسّ ـ
نموت من أجلَك
من غير لاوصيّه ولاتأمين.
=========
ياترى انا محوِّش دمع عينيا
ولا الدمع اللى محوّشْنى
ولا الفيلم السيريالى
اللى احنا عايشين فيه
هُوَّ اللى راوشْنى..
إنتَ وحشنى كتير ياحبيبى
زىّ أبويا الغالى ماهو واحِشْنى.
===========
إنتَ سامِعْنى؟
حاسس بيّا؟
أنامُتأكِّد
ْ.
يامحَرَّرْنا من الخوف..
والغُوص فى الوَحل فى قلب جبين الطين..
يامعلِّمنا
إننا لازم
نتحَرَّر من بلاوينا..
قبل امّا نفكّر
إزّاى هنحَرَّر
أرض فلسطين.
=========
ياحبيبى ،ياحبيب الملايين:
ورحمِة أبويا اللى غاب عن سمايا
وكان لى غَطايا
وكان لى سَنَدْ
وكان لى أسَدْ..
وعِملاق
ومارد..
ورحمِة أبويا اللى سافر لأرض الديابه
ومات ع الطريق زىّ حِلم الربابه
وكان لى دَفَا
وكان لى سَحَابه
وكانو يقولولُه:أصيل يابوخالِد...
ورحمِة أبويا
بَحِبَّك/يابابا.../.
==========
يانابوليون فاتِح أبواب كلّ قلوب الناس فى الكون
من تكِّة مفاتيح صُوتَك
الدافى،،
الصافى،،
العَفِى،وحَنُون
المُرسَل من فوق السما
زىّ رساله صَوتيّه
فى جهاز تيليفون..
بَعْدَك ياجمال
أسامينا
..كُلِّنا..
مكتوبه على رصاص الخَوَنَه
وبتوع التعذيب
ومحاكم التفتيش
وكمان فوق البيعه..محاكم التقفيش
غاصبينّا انّنا نِلبس
قُفَّه بودنين
عايزينّا نعيش طراطير،أو طرابيش
الخَونَه الأحقر من بيض الصراصير
وبقالهم ع الحال ده سنين،وسنين،
وسنين..
ناصبين مصيدة ال:حفله،وال:التشريفه،وتكسير العضم بإيد الهُون
قرقشُو عضمِنا زىّ القراقيش
صرخِتنا
مسمَّعه ربِّنا فوق السماوات السبعه
صرخة دَمعه
صرخه
طَرشِتْ وِدْن الكُون
حتى سُكاتنا بيجَلْجل فى الميكروفون.
إحنا اللى تِعِب مَلَك الموت
من قبْض ارواحنا
من كُتر ماخَدْنا وروَّحْنا
هناااااااك..
واللى بيسمَع
آخر تطنيش
مبكاش على موتنا
غير العصافير..،
والدراويش..
===========
بنحِبَّك ياجمال
يااللى صُوتك كان بالنسبالنا رغيف العيش
بنحِبَّك ياجمال
ياسَفير السَما
يارسُول الجيش..
وهنِفضَل ماشيين فى طريقَك
حتى
ان كَلْنا الجُوع،
وشربْنا دموع،،
ولبسْنا الخيش،،،.
                        خالد*******
====----------======------
5/2/2013
مساء الثلاثاء
=========----------========----