غريب الوطن 

غريب أنا في أوطاني

وعلي الغربه جبراني

أعيش فيكي وأرضيكي

وإنتي يا أمي هيناني

تدوسي فوقي برجليكي

وموت وأرجعلك تاني

فيكي عايش وأكفاني

علي كتافي

أقول هبعد

ماهو البعاد من قسوتك

أبدا مش  حنانك

جبرتيني أخوض البحر

وأركب موج أحلامي

أسيب ولادي علي الشطئان

وأنا الغرقان إجباري

ياشباب كان ذي الورد

قطفهم حلم غدار

★★★

ياعروسه مستنيه

فتي الأحلام راجع تاني

وأحلامهم الورديه

ببيت وولاد وحنيه

رجعلك ملفوف فأكفانه

وعيني عليكي يا صبيه

★★★

يا أم بلهفه وحنيه

وحضن كبير فاق الحد

ووداع لإبن عمري بجد

عليه سعيت وربيته

وشلت همه علي كتافي

كبرته وعلمته

 وشوفته بيكبر قدامي

وجاني في يوم وكان مهموم

يا أمي شهادتي مالها لزوم

وأنا نفسي أشيل عنك

حبيب القلب يا نور العين

كفايه شوفتك قدامي

أبوس إديكي ساعديني

أشوف حلمك وأحقك كل أحلامي

هسافر بس  سنتين

وأرجعلك كدا شيء تاني

أعوضلك سنين العمر

وتدوقي شهد بدل المر

بلدي يا أمي مش عوزاني

حبيب العمر خد مني كل كياني

بس إوعدني ترجع تاني

حاضر يا مه راجع تاني

ألو وصلت يا ضنايا

بموت يامه ورا أحلامي

بغرق حضري أكفاني

يا ويلي البحر غدر بيه

راح السند راح الغالي

ورجعت دموعي من تاني

#سناء أبوطبل

2016/9/25