سواح بلدنا راحوا فين ؟!!!
راحوا فين السائحين ؟!!!
سؤالي صعب ...
سؤال حزين ...
إحنا علي فين رايحين !!
من كام سنة ...
لأ ... من سنين 
كنت أشوف سواحين
من كل الدنيا جايين 
ولأم الدنيا رايحين 
نستقبلهم بالرياحين 
وشوشنا حلوة وضاحكين 
وآثارنا عليها محافظين 
علشان كنا بالعقل عارفين 
إن العُملة الصعبة تحّن
بقدومهم تسهل وتلين !
فكرى مشغول بسؤالين
الأول للمسئولين ...
ليه أفكاركم دايماً ضحلة 
سياحتكم شعارها حزين ؟!!
ليه شايفكم في برامجكم 
السياحية كدة خايبين ؟!!
ليه قرارتكم كدة أنانية ؟!!
ليه كدة دايماً مغرورين ؟!
أم الدنيا حضارة قديمة 
آثارها سليمة ....
وأنتم لسه مرعوشين !!
سؤالي الثاني للمواطنين 
جرى لكم إيه يا مصريين؟!
سواحكم ليه غايبين ؟!!
يمكن يكونا خايفين !
يمكن يكونا تايهين !
لكن أكيد راجعين !
بس رجوعهم مشروط ...
يلاقوا ناس طيبين 
السائح يرتاح لوشوشهم
يعرف انهم بنى آدمين 
وهدفهم راحة سواحنا 
في عملهم وطنيين 
وإن أعطاهم السائح قرش
يعطوه خدمات بقرشين !!
نفسي السائح كدة يتأكد 
إن في أم الدنيا حنين 
مش ناس تلقاه بالرقص 
وتنورة وصاجات ورنين !!
السائح هدفه يرتاح
ويشوف حضارة الفراعين 
لكن يا خسارة في تفكيركم
دايماً كدة متفرعنين !!
حتي علي سواح بلدنا 
عملتوا عليهم مساكين !!
السائح أصله إنسان ..
ماله ومال حالكم الطين !!
خلتوه يطفش من داركم
قال أحسن أروح الصين !!
شعب واعي ومتحضر ..
بسماحته جذب السايحين !!
وإحنا لسه بنرقص تنورة 
ونحني ديل العصفورة !
ونقول إحنا المصريين !!!!
نفسي نرقي كتير من ذوقنا 
يبقي السائح كدة مطمّن ..
ما نكونش فيه طمعانين !
السياحة دي فن أصيل 
عاش في حضارة ...
وادي النيل ..!
لكن بخت بلادي قليل 
في ضمائر ناس خاينين !
فاكرين السياحة بجاحة 
وشطارة وويسكي × تفاحة !
يا خسار يا أم الدنيا ...
سياحتك ...
ينقصها ضمير وصراحة
وأنا من الآخر كدة بصراحة
نفسي أقولها لكم بصراحة
لازم تتغير أساليبنا ...
يبقوا السواح حبايبنا 
السائح يشعر بأمان ..
وكأنه اخونا وقريبنا !
لأجل ما يتركنا ويسيبنا !
ونرجع تاني ننعي نصيبنا !
نرجع تاني ننعي نصيبنا !!
نرجع تاني ننعي نصيبنا !!

أحمد عبد اللطيف النجار 
شاعر أم الدنيا