مش جلت لك حبك جديم 
منجوش علي حطان التاريخ 
يحكيه بكاكي ودمعتك
حبك كبير ....وأناالأمير
جاي من الزمن البعيد
زي ورد النيل 
بعطر سكتك
حامل همومي وجصتك
جبل ما يجوم الهرم 
جبل ماتبيعي الهموم
ويظهر لك عدا 
ف المبتدا ..بازعج
وكاره سكتتك
وبغني مواويلك وموج نيلك
بزود جوتك
ويدوب سواد الليل 
ف موال غنوتي مع غنوتك 
أنا ياأمه نور دفيان ملاني الشوج
ويغزل زهرتك
ولهان علي طول الزمان 
مليان حنان ..مليان أمان
ولا عمري أرضي بحرجتك
ف الدم عايشه يا جضايا 
وإهتمامي جضيتك
بين الجوانح با كتبك بحروف دهب 
جلبي إندهب ف محبتك 
وبألا جي فني ....ف لوحتك
رايح ف طيات السنين 
مليان حنين....
و ح أموت وعاشج طلتك 
وجبل مني كتير ولاد
متعلجين بأطراف طرحتك 
علجوا الأرواح كما الأزهار 
ودماهم الطاهره
تورد وردتك
ياعروسه من قلب الضيا 
فايح رحيج الفرح من نور طلعتك
دخل الغزاه ..راح الغزاه 
عاشوا وماتوا وإنت عايشه بضحكتك
دوبوا التصاوير
نجشوا الحيطان 
عا شجين هواكي ونسمتك 
وإتغطوا بخيوط فرشتك
جلعوا النهار من رجدته 
حطوه علي ايدينك رضيع 
إتربي ف أحضان حضرتك
يا أم الخطوط الزرج مرسومه ف حجر 
بيجول يا غاليه جد إيه
كانوا بشر فوج البشر 
عرف الزمان معني الكلام 
من لهجتك 
لون لحمهم جمحاوي من لون بشرتك
راح الزمن وفضلتي باجيه 
حاضنه ف تاريخك جصتك
ولما يندار الزمان ولدك أمان 
ميت عشان حريتك 
لا الجوع كواه ولا جلش آه 
أكله وشرابه ف لجمتك
اولاد شداد راضعين بارود
عشاج لأوحال تربتك
غامجين كما لون هدمتك
م بيطلبوش غير فر حتك
راضيه وجاضيه ع الجميع
يا مصر عاشج غربتك
داب الجدر ولسه عايشه بضحكتك
اجمل وطن 
وطنيتي لو تعرفي 
مخلوجه من وطنيتك
حبك عاشجني من زمان 
إبنك وطالب دعوتك
لو نام سباع البحر
كنت نمت ف فرشتك
زنهار علي طول الزمن
حارس عنيكي ونظرتك
********************إبداعات الاديب الشاعر فوزي السيد15/9/2016