في البحر خوف وظلام

في البحر موج هدام

في البحر وحدة ، شجون

وليل مرهون

بلمعة صبح

يا بحر فيك أسرار

تخلي العاشق المحتار

يدوب في هواك

يمضي معاك

ساعات تايه في ملكوتك

ساعات يتملى في سكوتك

ساعات يضرب بجبروتك

في عرض الحيط

ويرمي نفسه في حبالك

بدون تخطيط

يلاقي نفسه بيصارع في موج مجنون

بيسحب فيه

بيلعب بيه

شمال حبة ، يمين حبة

يروح يرميه

على جزيرة

في وسط الموج تحن عليه

يقوم مفزوع

ما يعرف شرقه من غربه

لا يعرف سكته ودربه

ما يعرف طعم الملح في حلقه

ده طعم البحر

ولا هو طعم الدمع في عيونه

ولا هو طعم العجز

طعم القهر

طعم اللي اتنفى في البحر

وما يعرف طريق لرجوع

يحس الصخر بيطبطب عليه ويقول

يا صاحبي البحر ده حكاية

وسر كبير من الأسرار

تشوفه يبان كما مرايه

وموجه سر مالجبار

بينحت فيّه ايش قولك

وانا مخلوق من الأحجار

صبور والصبر ده آيه

تحقق معجز الأفكار

وعجبي