رباعيات 2
( 16 )
عالم لوحدى بيا أرضىى من فؤها سما
ف نهاره شمسى وف ليله نجمى ف السما
ممكن تغيب ! أيه يعنى ؟
ضيها منشور ف السما
وف ليلى البهيم قمرى منور بيدور بالسما
...............................
( 17 )
آعد ف مكتبتى ومعايا ألمى وكراسى
أهدى من نفسى وأفكارى زحمة ماليه راسى
عايز اكتب وعاجز ! ناسى المعانى ومش ناسى
لا سن الألم بيتحرك والصفحة بيضه ف كراسى
..........................
( 18 )
لما امسك ألمى وع الورق أشخبط
أعرف إن جوايا كلام كتير متلخبط
بفك رموزه واجرى وراه واتشعبط
لا انا مجنون ولاعبيط ولا بستعبط
..............................
( 19 )
" حسين " نفسى وانفاسى وحفيدى
حتة منى ع الأرض ماشية وليدى
يوم ميلادك ميلادى ويوم عيدى
اخد من عمرى لعمرك لو بإيدى
....................................
( 20)
" حسين " وردة بالغص لونها ما زيه لون
لونها بالسعادة متلون وملونة الكون
شروق الشمس منك يانور العيون
دا الحُسن من إسمك :
بضم الحاء والياء نشيلها قبل النون
................................
( 21 )
ألاقى مين غــيرك حبيبى لييه اكتب وأغنى
اكتب كلامى من طيفك حتى وانته بعيد عنى
بعيد الزاى ؟ وانته حــــفيدى وجوايا ومنى
عودى وريشتى واهز اوتارى بلـحنى وفنى
..............................
( 22 )
توب المخلوق ف الدنيا عنى ما ينفـــك
واطلب رؤيتك لا معايا رخصة ولا صك
حجبت عنى رؤيتك ورحمتنى من الفتك
سبحــانك تجليت ع الجبل إتهد و إندك
..............................
( 23 )
بكيت على ميت رحل وبكــــايا هــدنى
روحى معاه ف الكفن والكـــفن هزنى
مشيت وياه وعدت وحزنى مــا ردنى
رحل عن الدنيا ومشى راجـل بيحبنى
................................
( 24 )
بفكر ف الماضى والماضى أبــدا مش هيعود
وهز بريشتى ذكرياتى وبكى من الهز العــود
إيه يالحن الصبا والورق أخضر ومالى العود
دبل الورق ومعــايا ريشتى ورعشتى ع العود
.........................................
