رباعيات
( 1 )
ف دماغى ألف حاجة وحاجة
ما ف جيبى منهم ولا حاجة
يارب ...
ما تجعل لحد عندى ليه حاجة
وإيدى ليك وحدك ما تجعلها لحد محتاجة
.................
( 2 )
قاضى وأعد ع المنصة
وجيبه من الفلوس فاضى
يحكم ويؤمر ف الخلق بسلطته
وبره منصته كلامه من السمع فاضى
الناس من طبعها تسمع للمكيس
حتى لو كلامه من المعانى فاضى
كيس المكيس بالفلوس مليان
وجيب القاضى من الفلوس فاضى
....................
( 3 )
عايش فى هم الليل وف ذل النهار سارح
العين مجافيها النوم والصبح يطلع زى إمبارح
عايش ع الأمل والصبر
ومن غيرهم أنا للغرق رايح
يارب مدنى بالأمل وخلى شجر الصبر طارح
.......................
( 4 )
يارب .. كل الأمان منك .. كل الأمان ف إيدك مش بإيدى..
وحتى لوكان الأمان آبض عليه ف إيدى
على عرشك منى أريب .. وأأرب منى من حبل وريدى
ما تجعل حاجتى لغيرك ولغيرك ما أمد يوم إيدى
.....................
( 5 )
آفل عليه الباب .. ومن ورا الباب بعصاك
تتمنى ليه الرضا .. وبعيد أنا عن طريق " إياك .."
جاحد أنا من يومى وهوايا مخالف هواك
جبل الهموم والمعاصى كبر .. وأنا عدم فى بحر رضاك
....................
( 6 )
الولاد زى طرح الشجر منه المسكر ومنه المالح
إللى زاد سكره أو أل ما هو برضه مسكر
الأب يشرب سكره وحظه منه فالح
واللى زاد ملحه أو أل ما هو برضه مملح
الأب يتجرعه ورصيده منه طارح
................
( 7 )
معانى جوايا كتير ومش عارف أطلعها
ياترى من كتر فرحى ولا حزنى
مش عارف اشوفها أو اسمعها ؟
بالظبط زى الدموع
تتحجر ف العين من كتر وجعها
أو تجف من كتر البكا ..
عايز ابكى ومين ينزلها أو يطلعها ؟
..........................
( 8 )
ألوا عن التطور علم رغم إنه كله فروض
فروضه من العدم ما ليها بديل مفروض
هوه يحلم ويبل فرشته ويقوم مخضوض
يعمل بحلمه علم ويحطله سنن وفروض ؟
.......................
( 9 )
كافر انا باللى جعل وصله من نشأتى قرد
كل القرود أنكرت وألوا حرام نشبه بالقرد
احنا أعبد منكوا لربنا أمة القرود قرد قرد
لا احنا منا بشر ولا الإنسان فى حلئته قرد
.....................
( 10 )
نجوم السما شايفها ويؤلوا بُعدها ميت مليون
مليارمليون سنة ضوئية ياترى يطلع كام مليون ؟
جعلها هداية وزينة لينا بعدها بكتيره كام مليون
دا بريقها من نور خالقها وبنشوفها بكن فيكون
..........................
( 11 )
الإحساس بالأمان ليه لون وطعم تانى
طعم إن فى سكنك بلا كانى ولا مانى
ولا حد ببابك يطالبك بالشىء الفلانى
زى ديون للغير عليك للقاصى والدانى
........................
( 12 )
الأخ أخ لما يكون فى عز البرد دفا لأخوه
من غير كده يبقى كلام فارغ وجفا لأخوه
زى فرع الشجريكبرللسما ساند على اخوه
والأخ ميكنش أخ وخيره لغيره مش لأخوه
....................
( 13 )
ضلع من المربع رحل وبأه مثلث الأضلاع
لا أيمة فيه وحاد الزوايا مختلف الاضلاع
ضلع نايم وتانى شارد وتالت أعدته بالقاع
جبر الخواطر صفر فيه مثلث بلا أضلاع
.....................
( 14 )
عايزنى أنسى الزاى وأسامح
وانسى كل اللى عملته امبارح
كله ف القلب معلم مش مبارح
سهم جفاك غارس بالدم جارح
.............................
( 15 )
أنسى الزاى دا كله وكأنه ما كان
تعملى ملاك وعمرك معايا شيطان
دوبت توب الدفا والبيت بلا جدران
أزرع واخضر تحرقه ليه أبل الأوان
............................................................
