ثورة مصر 25 يناير (ثورتك)ـ

دى ثورتك

ودى فكرتك

ومهما كان سنك وعلمك

أو ملتك

دى ثورتك

********

إنت خطيب الجامع اللى واجهت ياما القمع

وانت اللى مهدت الطريق وقت احتشاد الجمع

وانت اللى فى الكواليس كتبت روايه رمز وسين

وانت اللى فى الأتوبيس حكيت نكته عن الفاسدين

وما سيبتش المخبز ولا المعمل ولا المصنع

وانت اللى طول عمرك غناوى الثورة

هى غنوتك

دى ثورتك

********

إنت اللى علمت الولاد فى الفصل يحموا الحق

وكتبت غنوه عن الفساد مليانه كلمة لأ

ووقفت تتكلم فى شارع وسط كل الناس

ودعيت على الظالمين فى جامع أو فى قداس

وكنت رافض تبقى عضو فى أى حزب يكون

وانت اللى طول عمرك بتحلم حد يسمع شكوتك

دى ثورتك

*********

إنت اللى خففت الألم وسط الميدان عن جرح عارض

وانت اللى شجعت القلم فى كل جرنان كان معارض

وانت اللى كنت بتحمى ضهر الثورة فى التحرير

وانت اللى طول عمرك بتتكلم عن التغيير

ماهوش يناير بس

لأ كان ألف شهر وشهر

مش الشهيد بس اللى راح

فيه مات كتير م القهر

ورغم كل الظلم شايل ضحكتك

وفى وسط أى ضغوط بتطلع نكتتك

دى ثورتك

دى ثورتك

........................

موقعى الشخصى على الانترنت رابط

http://www.hossamelokdah.blogspot.com/

 

المصدر: الموقع الشخصى للشاعر حسام العقدة : http://hosamalan.blogspot.com/2011/04/25.html
  • Currently 0/5 Stars.
  • 1 2 3 4 5
0 تصويتات / 51 مشاهدة

ساحة النقاش

عدد زيارات الموقع

6,790