الـقـشــر
تعريشة الخوص حتسرسب ضىّ علينا
والهايش حيزيد ... ويحوش خطاويك
لما الدخان يكتب إسمك على ضهر البيت
واما البط يسّرخ من الجوع ...
ويلاقى فى حضنك صدا صوته
وحتحدف ضحكة صورتك ع البر التانى
يمكن ترجع ...
وحتبلع كل الضحك الجاى
وتفك حبال الليل المحدوفة على السطح
ما بين النخل وبينك
ولا عدت حتفرش دمّك ع الأسفلت
ولا حتدحرج ريحة البطيخ تحت الترابيزه
ويّا اقراص الكيتو المحروقه
وكويس إنك ما حتقراش الكف ...
ما تخافش ...
حيفضل وشّك تحت قزاز الصيف
بس تحاول كل ما تبقى لوحدك
ترفع إيدك قدام الحيط
واعرف إنك حتبطل تغسل جسمك م الملح
ورا الباب الورّانى
واوعى تحاول تكسر مرايات الصبح فى إيدك
وتمرجح كل الأفكار التافهه من الشباك
والعصر ...
حتعمل شاى
وتجيب قشر البطيخ للبط ...
........................
موقعى الشخصى على الانترنت رابط
http://www.hossamelokdah.blogspot.com/

المصدر: الموقع الشخصى للشاعر حسام العقدة : http://hosaam2.blogspot.com/2010/10/blog-post_4240.html
  • Currently 0/5 Stars.
  • 1 2 3 4 5
0 تصويتات / 63 مشاهدة

ساحة النقاش

عدد زيارات الموقع

7,721