المشط

مين فينا هيهرب م التانى ؟

إدخلوا ذاكروا ...

هنسيبكوا دقايق

واحكوا علينا فى مواضيع الإنشه

إحكوا عليها ...

واحكوا علىَّ ف نفس السطر

وازاى هتعلمنى ...

أكتب كل قصايد عمرى

ف ست دقايق

واسرق ابياتها

وتعلمنى ...

اكتب إسمى

على أى مكان هتطوله اديّه

وتعلم شجر الضل

تلوين أوراقه ببصتها

وتعلم كل جروح الأرض ازاى تتألم

الشبابيك بتبص على عروقى

نسّتنى انا عايز إيه

والباب مقفول على كل الناس

وسنين عمرى الجايه

وقعت على طرف السجاده

توهت الصحرا على شفايفى

وتراب الشارع داهس ع الفرش

اصواتهم بتعيط بره ...

بتتخانق على البرايه

وهنصحح كل الواجب إمتى

عرق الأيام متلخبط

على ريحة العطر ف صورتك

بهتت فى عنيَّه تورينى

المتدارى فى تغميضى

وإزازة الميه الخضره

الحشرات وقعت فيها

........

وانا عطشان

هتكلم تانى ...

علشان اقولك ...

ان ساعات الصبح كلامها ف سيرتك

بتشاور على بلكونتك

والليل بيدارى الشمس ف أوضتك

هتكلم تانى ...

علشان تحلفى إنه ما كان حلم

واكسر كل شرايط مياده

واضحك على كل كلام الحب .
.........................
موقعى الشخصى على الانترنت رابط
http://www.hossamelokdah.blogspot.com/

 

المصدر: الموقع الشخصى للشاعر حسام العقدة : http://hosaam2.blogspot.com/2010/10/blog-post_4490.html
  • Currently 0/5 Stars.
  • 1 2 3 4 5
0 تصويتات / 45 مشاهدة

ساحة النقاش

عدد زيارات الموقع

6,642