نويت أبطل سياسة
محمد ضباشه
نويت أبطل سياسة
وأشتغل مع الرقصات طبال
مدام دخل السياسة
لصوص حروب ونضال
وكل يوم على الشاشات
بهزار ولعب عيال
وكأن شعوب العرب
حبة حمير وبغال
ما بيفهموش في السياسة
ولا ليهم في المجال موال
وهما مضحوك عليهم
وباعوا العرب بريال
وكل هم اللصوص
يفهمونا بأنهم أبطال
--
وقلت أبطل سياسة
وكفاية عليك ثورات
بتطلع تشارك وترجع
تندم على اللي فات
وبتشوف حالك أسوأ من الأول
وتحزن على اللي مات
وعيونك تبات تشكى
ودموعك نهر من الآهات
وياريت فيه حاجة بتتعدل
وياريت يطبقوا الشعارات
عيش وحرية وكرامة
وعدالة بين البشر بالذات
يارب إحنا في وادي
ووادي الظلم لة علامات
كل العرب شايفنها
واللي مش شايف أكيد أموات
--
ونويت اشتغل شاعر
وبكلمتى أنضف عقول الناس
بكلمة حب اوصفها
مليانه بحور احساس
وأخلى الكل يتوضى
ويمسك قلمه ويا الفاس
لجل نعيد المجد
لشعب أكيد منداس
وقلت لو ما قدرت
هروح اشترى نسناس
أسرح بيه فى الموالد
عشان ما أكون محتاس
فى لقمة وهدمة وشربه
ويمكن اشتريلى مداس
