وعهد الله
محمد ضباشه
(النسخة الكاملة)
وعهد الله انا فيكى
مدفيكى .. وعايش أنا بردان
وعهد الله أنا ليكى
مهنيكى .. وأنا الشقيان
وعهد الله أنا بيكى
وبين الناس .. بقيت متهان
عشان مصرى
ولا مصرى عشان
أنا جبلك
أنا نيلك
انا قمرك
انا شمسك
أنا أيديكى .. وأنا الفنان
أنا اللى برسم كل يوم صورتك
على جبينى
فشدينى .. لحضن حنان
لبر أمان
بلاش ترمينى فى ايديهم
وفى عنيهم مصيرى بان
يا أما عايش بلا مأوى
ونسيوا الرحمة والأحسان
يا أما بصارع على لقمة
وفى الزحمة ونار بركان
بتاكل كل اللى فى ايدية
ومالية .. فى البلد دى مكان
--
وعهد الله أنا ميت
ماعارف حتى فين قبرى
ودايما أقول يا ست الكل
أنا مدفون مع صبرى
وبالعربى
بقيت عربى .. وأنا مذهول
وخايف اغوص فى احوالنا
ولاحوالنا
بقيت مهبول
بقيت مخبول
بقيت ميت ومش عايش
ولو عايش
على الصراخ على طول
على تقسيم
على تعتيم
على ترميم
على حكام ياربتها تقول
وصوتها تسمعه ودانى
ونادانى لسان مشلول
وأعمى
وأخرس
وقالى
بكرا .. وبالعزيمة نطول
ونقول
ونصرح
ونمد ايدينا فى بطن الغول
نمد ايدينا وأنا المسئول
--
وعهد الله أنا خايف
على بلدى
على ولدى
على شابة فى عمر الزهر
عنيها من البكا دبلت
وهى من جدور الدهر
شجرها مال فى ايامنا
وما لاقى شربته من النهر
وداقت قهر
وشربت من كاسات الذل
صباح الفل يا صحابى
على بابى بقيت محتل
من الخونه
ومن الأعداء
ومن كل جماعة علينا تطل
تحرف أيه فى كتابى
يا احبابى طريقهم ضل
شككونا حتى فى اسلامنا
واسلامهم علينا حل
اباح القتل والسرقة
وخلى الكل منهم مل
وبقت زيطة فى ايامنا
ولأحلامنا سرقتوها
وبعتونا بدولار اعمى
ويا أعمى قتلتونا
باسلامكوا
بايامكوا
بأحلامكم
بحبة جهل
ومن جهلى رضيت الذل
صباح الفل
أنا راجع
وهسقى الشجرة من نيلى
وأعزف على الشموس لحنى
وأخلى القمرا تغنيلى
وقناديلى
ومواويلى
وكل الناس
تيجى تحضنى
ونتقابل أنا وليلى
بمواويلى
وضوء الشمس
وحبة همس فى ودانى
ونادانى لسان مشلول
بقينا وبالعزيمة نطول
وقد القول
تعالى نقول
خلاص سمعنا غناويكى
وانا بيكى
وانا فيكى مدفيكى
وبقيت أنا أنسان
وعهد الله انا بيكى
وبأيديكى بقيت شبعان
وعهد الله انا ليكى
أمان وحنان
( تحيا مصر )
