صيد العصاري

اشعار د./ أحمد الطباخ (أبو حميد)

إعداد/محمد شهاب

ساعة العصاري عندنا
يحلى القعاد ع البحر
تشوف هناك و هنا
الموج يبوس الصخر
يقوله من غيرك أنا
لا حس لي و لا ضهر

تهل نسايم المسا
تمسح هموم اليوم
و الهم لما يتنسى
تتهنى العيون بالنوم
تفتكر أيام كويسة
لما الليل كان له نجوم

تسرح في دنيا الله
في الكون تهيم الروح
تلقى لكل شيء معناه
حتى البكى و النوح
بنسمة تنسى الآه
و تشفي جراح مدبوح

لو العيون تغفل
تشوف أحلام غطاس
في قعر البحر يأمل
يعبي المحار في أكياس
و لو كان له مقدر
يلقى اللولي ف أصداف

تسمع غروب الشمس
يقول إنسى هموم اليوم
بشعاع القلب يمس
يدعوك للبحر تعوم
إغسل جراح النفس
دا العمر كله يوم

نداء الغروب

ندحرج التماسي من تحت الشماسي
للجدعان في بحرك و ع النواصي
أيووه يا جدعان دانا كونت ناسـي
إن ولاد جيهتنـا جبـال رواسـي

ساعة العصـاري نمـد الكراسـي
نستنى الغروب و نصطاد سَياسـي
يضرب دنيس و قاروصنا عاصي
البوصة ملطـي و لبلوبنـا قاسـي

عرايس بحرنـا ترمـي التماسـي
طعامة و غندرة و الكـل راسـي
بالعيون تلاغي و يزيـد حماسـي
يا بنت بلـدي يـا ماليـة راسـي

تؤمري تلاقينـي ألمـع نحاسـي
بالميري واقف رافع فـي راسـي
ما يهوب يمك عـزول جبيصـي
دا بنفخة منـى أخليـه يصاصـي

يا إسكندرية يـا أهلـي و ناسـي
المرسـي قالـي الدنيـا مقاسـي
دا حبـي ليكـم شـيء أسـاسـي
يدوم لي بحرك و ضل الشماسـي