عمر ...
............
القصد ..
خطفني غيابك 
وخدت الدنيا معاك 
ولا عدت راح اطوي الارض
عشان لقياك 
ولا عدت اقعد في البيت 
علشان أرعاك 
ونذاكر سوى ونهزر
ويوم تتأخر ..
نملى الدنيا زعيق وعراك .
مشتاقلك يا ابني 
والمستقبل من غيرك باهت
والخطوة من بعدك تاهت 
والضحكة الكانت مالية علينا البيت 
سقطت من طولها وشاخت 
وفاتتلي في قلبي الحصرة 
وحيط .. داخت 
اسند على مين ..؟!!
ودليلي ونور العين 
عكازي لما العافية تحيد 
فاتني وهملني وحيد ..
وأخد وياه ..جلابية العيد .
وحياة مين خلى الأرض تدور 
لا هكون مسرور 
ولا قلبي هيسعد في غيابك 
ولا حد في يوم 
يجرأ ..يقعد في مكانك 
ولا بقه يلمس في منابك .
مندور لله ..كل نصيبك 
وانا راضي بقدرك ونصيبك 
يا لطيف اللطف ..
نزلي سحائب رحماتك 
واطفي الحرقه ..
هون.. هون ..
هون يا كريم نار الفرقه .
ارحم يا رحيم ..
والقاني يا ولدي 
في يوم الحشر 
افردلي يديك ..
واسقيني ما ورد .
شبعني من نظره في وشك 
محتاج لمحنه..
خدني في حضنك 
حضنك دا الجنه .
بكفايه غياب 
لفلف حواليا ..ووريني 
ورينني..
كما كنت قمر 
وشك يا عمر 
شكلك كما كنت 
يا نني العين 
لملمني يا ولدي وجمعني 
بايديك الاتنين 
خدني من الزحمه ..للرحمه
لنعيم الله ..
واحضني ..وحاسب علي جسمك
من تجاعيدي ..
م الشوك النابت في وريدي .
وافردلي رموشك يا ضنايا 
سجادة فرض.
عوضني ايام حرمانك 
وقساوة الأرض .

مهداه إلي .. روح عمر حسين بهيج 
من عمك :حمدي حسين