قصيدة صلاة الغائب الحاضر
4 نوفمبر، 2012، الساعة 09:34 مساءً
مين انت يا قلبي؟؟؟
مين اللي حاسس بيك؟
وانت متعلق
ما بين الصبح والمشوار
تشحت الأنفاس
من كتمة الشبابيك
تحزن ما تحزن
الدنيا مش دنيتك
والحزن مخلوق ليك
اصبر وصلح كالون مفتاحك المكسور
وان دار فى راسك خلاصك
هد السحابه العفيه والغيوم السود
وارتاح فى ليل المحيط المحيط
قلبي اللي كان أرمل يبات
زى النبات
لما أتمنع عنه الحنان والرى
مات
فعاش عاصي ومش قاسى
وبل عانى عمل ناسي
بان فيه في الكون
بنات
قفل عليه بابه
وفقره في جرابه
واستكفى بكتابه
شبابيك على الدنيا
طياره سكسونيا
بتنش في الخيالات
وتحش في شبابه
ولما حس بأنه مش عايش
لملم حروف الحب والكلمات
غزل المشاعر ع الورق غنوه
بالكذب جات عنوه
ما فيهاش ريحة الورد
ولا خفة الحركات
قفل عليه بابه
وفقره في جرابه.
فلاش
مش
باك
رمى كتابه من التوهه مش الشباك
وبص وطل ع الدنيا بعين تانيه
مش الشباك
شعاع الشمس كان نازل من الكوه
مش الشباك
وانا لا حول ولاقوه
بلا شباك
وقلبى دالسجين جوه
ورا الشباك
أبو الشكوى وأم الأربعين شقاوات.
وجات هى
من غير مااعرف ليه
جات هى؟
فتح قليبى عنيه
سندت دماغها عليه
لعبت كمان فى ايديه
ومن غير خشا
فتحت هويس الحب والفرفشه
اتهنى يا قلبى
ماخضوضرت جناتك الموحشه
بقى للحياه معنى وطعم ولون
بقالك ليلى يامجنون
ليلى واقفه ف البلكون
بتتكلم تقول بردون
تنام تصحى على التليفون
بتتمايل على اسمك
بتتهجى حروف رسمك
خلاص حبيت
اخيرا دوقت طعم الحب
واتحسيت
خلاص حبيت وروحت وجيت انا وهى
لو اتوضيت بنتوضى انا وهى
ولو صليت وراى هى
ولو غنيت معاى هى
ولو فى الليل اخدنا الشوق
بساط الريح بيخطفنا انا وهى
وخد مش هات
بنسقى الحب للفلوات
انا وهى
ولو عدا علينا يوم
وانا مفطوم من الطله
باقول يالله
واقوم يالله
وازق ازق طول اليوم
ولما اتعب
اروح فى النوم
على دراعى تنام
هى
لحد مايوم
بابص بعينى فى الصوره
مافيش فى الصوره غير
هى
وانا فينى؟!!!
وباعمل ايه؟
رابط قلبى بالمنديل
وانا اللى عليل
وكيف اربط على قلبى
وكيف اطفيه واولع فيه
ب100قنديل
وكيف اكويه
جروح العاشقين اكبر من
من المناديل من القناديل من السماوات
لبست التوب
جديد ابيض جابتهولى
على كسمى على طولى
كفن اموات
خلاص يا حب....
لاخد ولا هات....
خلاص يا صوم
ماعادشى لا فيه عتاب ولا لوم
ولا نظرات ولا سكرات
ما فيش غير هي وحديها
صلاة الغائب الحاضر
بلا ركعات.
شعر/حمدى حسين
ساحة النقاش