أي أنواع التطريز المفضلة في الملابس الكاجوال أو ملابس الصبح؟

التطريز النهاري أصبح حاجة عادية وموجود على كل حاجة، على الإيشاربات وعلى الشنط وعلى السابوهات وكمان على الملابس في كل مكان، والتطريز البسيط والرقيق أكيد هيضيف لمسة جميلة لأي حاجة وزي ما قلت حاولي تعملي تطريزك بنفسك على لبسك عشان يكون لبسك مميز عن أي حاجة.

هل مازالت ألوان البني والفستقي الفاتح والأبيض في الكتان هي الألوان الأساسية زي السنة اللي فاتت؟

طبعاً الكتان موضة مش بتبطل والألوان دي مستمرة يزيد عليها اللون البيج والنبيتي، النهارده فيه كتان مشغول ومطرز منه فيه نوع جديد من أقمشه الكتان، والقماش ده غالي شوية بس شكله حلو قوي سعرها جاهز ممكن يوصل 300 جنيه لأن الجاهز بيحمل المشتري ثمن القماش مضاف إليه ثمن تكلفة المصنع لكن التفصيل أرخص كثير.

هل استمرار موضة البني المحروق مع الألوان المصاحبة له البرتقالي والتركواز والأحمر والروز والألوان الغامقة لا تتناسب مع ارتفاع درجات الحرارة التي تتطلب ألوانا فاتحة لتعكس أشعة الشمس؟

البنات بتحب التغيير والموضة وخلاص ماحدش بيلبس أو يمشي على الحاجات الكلاسيك سواء في اللبس أو الألوان.

القماش الجينز نازل بقوة في كل الموديلات، ما نصيب المحجبات من هذه الخامة؟

على المستوى الشخصي أفضل هذه الخامة جداً في التفصيل أو في اللبس، والجينز خرج من النطاق المحدد إنه يكون مجرد بنطلون، النهارده هو كل أنواع اللبس بدلة وجيب وقميص حتى عباية أو تايير، وكمان الجينز النهارده موجود بكل ألوانه "الفوشيا" والتركواز والبني والبستاج مش مجرد الأزرق أو اللبني بس، أي لون يخطر في بالك هتلاقيه في الجينز...

وعلى فكرة خامة الجينز فيها الخفيف والثقيل، والخفيف منه مناسب جداً للصيف لأن داخل فيه نسبة قطن كبيرة.. بالنسبة لتصميماتي بافضل الجينز الفاتح وممكن من بعيد ماحدش يعرف إنه جينز وخاصة لو كان أبيض ومطرز، النهارده ممكن نعمل كورساج وجيب من الجينز، والجديد إن تطريز هذا النوع من القماش اللي كان معروف عنه إنه كاجوال وبس، النهارده بنلبس الجينز بالليل ونطرزه.

ازاي البنت المحجبة تختار لبسها وتجمع في نفس الوقت بين الشياكة والحشمة؛ لأن صورة المحجبة أصبحت مشوهة، إيشارب من فوق ومن تحت بادي ضيق وبنطلون لوويست؟

لا يوجد تعارض بين الأناقة والشياكة، والحجاب ده مبدأ أنا مؤمنة بيه جداً، لما فكرت أفتح أتيليه كان نفسي أخلي كل البنات المحجبات تلبس شيك وعلى الموضة وماحدش يقول المحجبة دي شكلها وحش أو شكلها "بلدي" وغيره من التعليقات اللي -الحمد لله- أصبحت غير موجودة، بالعكس المحجبات بقوا يلبسوا أشيك حاجة ولو محجبة شكلها وحش أعتقد إن ده راجع ليها مش للحجاب، وأكيد ربنا مش هيفرض علينا حاجة وحشة.

دايماً القاعدة نختار حاجات لا تصف ولا تشف، البنت اللي في الجامعة مثلاً ممكن تختار أي موديل تحبه بس تحاول توفقه بحيث يمشي مع الحجاب، لو مثلاً عجبها "حمالات" ممكن تلبسه بس يكون تحته تي شيرت من نفس اللون بشرط يكون واسع شوية وتلبس بنطلون جينز أو كتان يكون واسع.. بلاش البنطلونات الضيقة، أو عليه حاجة طويلة من فوق قميص أو بلوزة طويلة.

رأيك إيه في موضة الفستان القصير وتحتها البنطلون؟

بصراحة موضة لذيذة جداً ومناسبة للبنات، الموضة دي موجودة في أوروبا من سنتين وفعلاً شكلها حلو جداً لكنها لسه نازلة عندنا من وقت قصير، ممكن البنت لو عجبها فستان حمالات أو مشجر أو فيه كرانيش تلبسه وتوفق معاه جينز لونه حلو وتي شيرت -طبعاً واسع- وإيشارب يتربط بشكل معين يغطي الظهر والأكتاف، الأشكال دلوقت كثيرة قوي وبتسمح بكل الحاجات الجديدة، والفكرة حلوة للسن الصغير وكمان تغيير وأفضل من لبس البنطلون اللوويست.