معلش انا اسفة / دخلت على الأكل /معرفش ليه لما البطون بتتكلم كل العقول وراها تقول 
ما علينا يا سادة يا كرام / نبدأ الكلام وندخل بالرجل اليمين / من أول البوابه أم السور العالى 
عليها اتنين قيامة طول بعرض وكلامهم زين / عارفين انهم بيتكلمو مع الجنس اللطيف أمال 
تعالو نشوف :
من كام سنة كدة وطبعا مش حقول علشان متعرفوش انى من الناس القدام اللى أكلو الخير كله 
قلت خير الهم أجعله خير اقدم فى المدينة وارتاح من المشاوير /قالو يا زينة البنات ملكيش سكن عندنا 
لا قليوبية ولا جيزة دول من أهلنا المساكين قصدى القريبين / واتحملنا سنة طويلة فى المواصلات الجميلة المريحة 
اللى على طول من عندنا للتحرير ومنها الاتوبس المكيف الخاص بالجامعة /أوعوا تكونو فاكرينى بالتريق لاسمح الله
مش انا قلت لكم ايام العز واكل الوز  / المهم عدت على خير وجيبنا التقدير وبقى من حقنا نقدم على طول ونسكن قصر المدينة الحرير 
ونترحم من معاكسات ومشاكسات الطريق .وبكرة نكمل مراحل عذاب التقديم والسكن الجميل .